ليت للطيب علامات

طابلى يالربع ممشاى ضحويه
زينت الممشا ذعاذيع الصباحي
مع براد الصبح والابا العشيه
طيبة الاوقات هذى للمراحي
أن نويت تروح والنيه مطيه
وكل الله وأسلك دروب الفلاحي
أطلب الخلاق لك من حسن نيه
أنت بالتوفيق وأهلك بالصلاحي
الله اللى عالم ما فى الخفيه
والسفر غدار لن زاد الجماحي
السفر لن صار بديار عذيه
يجلب الراحه وبالنفس أنشراحي
عادة الاجواد حضره وبدويه
ثابتات ولا يصح الا الصحاحي
يوم كل من نوى نادى خويه
قال شوف العفش جاهز في البراحي
بينه ماهي عن العالم خفيه
والخوى مخدوم كل شى له مباحي
عادة الاخيار والنفس الابيه
قول بالافعال ماهي بالمزاجي
في التلال زهور مثلا المزهريه
والفياض زهورها مثل السباحي
ودي أمشى في الفياض النرجسيه
لا زعاج ولا زحام ولا صياحي
جوها هادى وأنا غالى عليه
بس يازين الحياه مع الكفاحي
المولع منوته يجلس بفيه
في فياض ورافه وأرضاً براحي
لو ما يملك كثير ولا بليه
كود حكم القوت والماء به قراحي
الحضيض اللى معه زاد مطيه
ما نقص له شيء لو حتى السلاحي
مع قروم أهل الكرامه والحميه
سرهم محفوظ ما والله يباحي
الحطب والكيف أنا خلوه ليه
بس كلاً قال الاولى باقتراحي
ليت للطيب علامات قويه
أنت تعرفها وهي سر النجاحي