صوت الصورة

عين الخطا ياللي صدمت الاشاره
ما تقتدي بالسير والا نظامه
فعلتك يالمطيور طيش وقشاره
تستاهل التوقيف وأيضا غرامه
سعود سعد الحافي - الرياض
يا راع الموتر عسى ما شر
وش فيك ما تشوف ما صوره
الظاهر إنك عجزت تفر
وغدا الدركسون في موره
شكله خطمها بدون يقر
وأم الركب داهمت دوره
عبدالله ذياب الحربي - بريدة
حسبي على اللي حط عامود بالدرب
مكانه المعروف جنب العماره
وقت الزحام اليوم سبب له الضرب
صدمه قويه بالغماره خساره
عبدالمحسن المحيسن - رياض الخبراء
جبت الخبر وابشر الناس بالصوم
مسرع ولاطفت الملف بسهوله
ويكفي علي أضرار لا تكثر اللوم
راح الونيت وفوقه أيضا حموله
حمد عبدالله الوايلي - حوطة سدير
راكب على الدباب شايل خويه
ومعهم عربيه يجرونها جر
وسط النهار وفيه شمسنا قويه
يبون يشتغلون لو كان به حر
مع الشوارع بس روحه وجيه
يدورون الرزق لو كان بالبر
عقلا خزن - تبوك
ربك ستر لا يكون فيها وفاته
ومابه خساره دامها تسلم الروح
الرابح اللي ما يسوي سواته
ويأخذ من الدنيا العِبَر درس مشروح
عبدالله بن عبود السهلي - تبوك
ليه الإشاره ظهره في طريقي
أكيد هذي ما اعرفت وجهة السير
أول صباحي تو ما انبل ريقي
اطلب رضا اللي كاسي الريش للطير
ما امداني أصلًا في ملفي اويقي
الا وتخطم في دروبي مواصير !
عبدالكريم بن خزيّم - البكيرية
الله وقاك ورحت صوب المواصير
والحمد للمعبود ما جت حريقه
لامن مشيت الدرب خل التفاكير
والسايق الفاهم يعرف طريقه
محمد بن عبدالعزيز الخنيفر - أشيقر
مخالف نظام السير وصدمت لوحه
لين دخلت بين السياج وتخفت
فوق الرصيف من كان يمشي بروحه
من خوف بعض السايقين يتلفت
سعود عبدالعزيز الهزاع - نعام
أصلاً خطا لو يسمحوا بالمداخيل
وسط المدينه يا العراوي تمشى
أنت مكانك بين ذيك المداخيل
مشيك نهار أو كان بعد المعشى
محمد بن فهد الجلعود - سميراء
يبي يوقف بالرصيف وجاب العيد
وبعد الرصيف اعطب عمود الاناره
راع الونيت الفعل ما هو حميد
والتهور دوم ياتي خساره
سعود عائش الحربي - جدة
الرفق مطلوب وفيه السلامه
واحذر من السرعة ونفسك عزيزه
كانك على هالحال تلقى الندامه
واسلوبك المخطور محدٍ يجيزه
ريان بن محمد الخنيفر - الرياض
يا صادم العامود خسران خسران
رفرف وشمعه واسطب الوكاله
طالع على الرصيف غلطان غلطان
مخالف.. مخالف ولابه مجاله
عبدالله علي الحوشاني - الرياض
مرحومة يا شارة الدرب بالسير
اشارةٍ تامر على الناس تنهى
جاك القدر يا الله عسى الناس في خير
سايق تهور ومخالفاً وين ودا
خالد بن ناصر المخيمر - روضة سدير
صورة العدد
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 4871070
ونرحب بما تلتقطه عدساتكم