ولي العهد والشعب هنوا وشادوبه

نسوق القوافي سوق لا جالها ماجوب
ولا خير في رجل قصر دون ماجوبه
اصخر بيوت الشعر في أميرنا المحبوب
بيوت على الشاعر من الشعر محسوبه
يغني بها الطرقي على جرت المسحوب
لامنه ضرب له تختخ زافت عشوبه
فيافي الديار اللي حكمها راع المركوب
معه من هل الفزعات ستين منجوبه
بنا دولة التوحيد يوم البلاد حروب
وهي قبل يدخلها من العز مسلوبه
نسينا الزمان اللي كلا الغالب المغلوب
وعشنا زمان الخير والأمن والتوبه
عسى الله يديم الأمن لدار ستر وثوب
ويرفع مقام اللي يجي الأمن من صوبه
بلاد بدون أرجال يلعبها اللاعوب
وخيراتها مع طول الأيام منهوبه
دهات الرجال تصونها لا يجيها عيوب
مثل نايف اللي يقهر الخصم بسلوبه
أمير به الحكمة وعنده ذكاء وأسلوب
أبو متعب اختاره وشعبه تغنوبه
لا من الوضع جابه من الخصم دحم جنوب
وقف وقفه تبقى على كل مشذوبه
على قولت أهل العرف له ماقف محسوب
هو اللي اليا مس الأمن شب لاهوبه
زعيم الأمن لصار لأهل الخراب جيوب
ولي العهد والشعب هنوا وشادوبه
يقدم له الشعب السعودي عهد مكتوب
على صفحة التاريخ تقرأ ومكتوبه
زهى حنكة القائد وإليه الأمر منسوب
ولد شايب جعل الولي يغفر ذنوبه
سعيد بن فالح المهداني