صوت الصورة

وقت البساطة راح لو تذكرونه
يقضي لزوم الناس سيكل .. ودباب
وأشوف صاحبنا تبين سنونه
مبسوط فالتصوير والوقت غلاب
سلطان سعد السهلي - المجمعة
صوره قديمة يوم عرض السياكل
في وقتهم مركوب في شيل الأغراض
ماله صيانه .. ما يسبب مشاكل
خالي من الكربون وأسباب الأمراض
سعد الحماد - روضة سدير
فوق العلف مركبك كان أنت راضي
والا على رجليك تذهب ونلقاك
في شغلتي مرسول مانيب فاضي
ويا الله لقيت القت يا عنز لرضاك
عبدالكريم النغيمشي – الربيعية
يبيع ويشري بالشوارع غريبه
تحكي لنا الصوره عن اللي يجولون
على السياكل والطريقه عجيبه
لامن رقابه والعماله يريدون
محمد بن عبدالعزيز الخنيفر - أشيقر
جملة اعوادٍ جابها عامل الحاره
من فوق دراجةٍ للسوق جالبها
والقدم باين في حالة اسواره
يا حياة الشقا في وجه صاحبها
حمد عبدالله الوايلي - حوطة سدير
عهداً مضى نشوف بالوجه ابتسامه
والحال عالم سرها .. عالم الغيب
سوقٍ قديم وسيكلٍ يحمل علامه
ما بينها واليوم نهضة للبيب
سعود عائش الحربي - جدة
ناقصك تركب سلةٍ فوق سيكلك
يا محمّلٍ فوق سيكلك برسيم
وعن الزخارف يا علي ودي أسألك
وشلون تلقى سيكل سنين ماسيم
سعود بن عبدالعزيز الهزاع - نعام
الصوره اللي بها جذعان
تحكي لنا ماضي الديره
اللي بها سيكل ودكان
ذاك الزمن ماضي أو غيره
عبدالكريم عبدالرحمن السلوم - القرائن
أيام حلوة في قديم الزماني
يوم العلف يشرى من السوق بريال
قبل السياكل .. قبل ما يورد الياباني
ونمشي به الشارع بلا غتر وعقال
خالد بن ناصر المخيمر
يا زمانٍ فيك شيخ السياكل
فيك عدل .. وفيك ميل .. وفيك سجه
والبحر في بطنه الحوت إيتواكل
ما نقص من ما البحر ما ذاق مجه
بدر بن خلف الحزيمي
حمله من الاعلاف يا من يريده
هي آخر البيعه مع خفض الاسعار
لا تفوتك الفرصه تراها جديده
اسعارنا زينه وغيرنا نار
ريان محمد الخنيفر - الرياض
سيكل علف والناس من حوله وقوف
والابتسامه ما تفارق محياهم
في ماضي الازمان.. في هاك الظروف
ما به تحاسد غير حب.. وتفاهم
بشائر القحطاني - الرياض
جاك الخبر يا صاح في عصر الاثنين
والكهربا عذراك لا شي غيره
نعمه من الله خارج الهم والدين
والابن ترنها عضيد الاخيره
علي آل زولان الفيفي - بيشة
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 4871070 زاوية ( صوت الصورة )
ونرحب بالصور الهادفة والطريفة
صورة العدد تصوير سلافة الفريح