بيت وصدى

كان بيت الأسبوع الماضي من طرح الشاعر محمد عبدالعزيز الخنيفر من أشيقر والذي يناقش قضية ثقل الحقيبة المدرسية على الأطفال:
طفل صغير والكتب تتعب الحيل
يأخذ دروسه كلها طيلة العام
وكان الصدى من الشعراء:
الواجب انه ياخذ الدرس تحليل
تعرض له الفكره بتقديم الاعلام
يسلم من التحميل ويقلل الشيل
لا شال له حمل على المتن ينظام
ينظم الجدول ويرتاح بلحيل
ويوزع أدروسه على خمسة أيام
علي رشيد الرشيد - رياض الخبراء
ترى الظهر خطور بالكسر والميل
لا زاد حمله فوق حمله بينضام
طفل المدارس كاده الحمل والشيل
كتب ثقيله فوق متنه وقدام
ليت الوزارة تاخذ الوزن والكيل
تصبح مناهجنا وتحقيق الاحلام
عبدالمحسن بن محمد المحيسن - رياض الخبراء
الطفل طفلاً اتعود على الشيل
وهذا النظام ويلزم الطالب الزام
بعد الرجا نقول تكفون تقليل
ترى الوسط مذكور بركان الاسلام
بعض الشباب ضعيف بالجسم والحيل
كم مرتن شفناه يمشي بالاقدام
سعد صنهات السهلي - الدرعية
يا طفل لا تكثر من الكتب وتشيل
رتب دروسك كلها طوال الايام
كثر الكتب يا طفل يتعبك با الحيل
خذ ما يخص اليوم من كتب وأقلام
مبارك بن محمد الضعاوين - وادي الدواسر
الوضع يبغى حل يا مربي الجيل
ما أظن يبقى الوضع في كل الاترام
لازم نظام وجدول(ن) فيه تفصيل
ولا خطر(ن) منهن يميلن الاعظام
ياالله يا والي عليك التساهيل
ياالله عسانا دوم للعلم خدام
عبدالمحسن بن محمد الجريسي - الدياض
قولوا لوزير التربية يا رجاجيل
يعمل لنا للمشكلة حل باشمام
رجل الشكالة من رجالا مشاكيل
للبيت خداما وللشعب خدام
متوارثين المجد جيلا بعد جيل
يحفظهم الله للعروبة والاسلام
زين بن مقبل العنزي - بريدة
عموده الفقري تقوس من الشيل
لو هو جمل يبرك على البيد ما قام
شنطة مسافر وزنها زايدٍ حيل
ما هي لطالب حاجته كتب وأقلام
حاسوب يقلل كايد الحمل تقليل
هو ليه نرجع خلف والدرب قدام؟
نواف ابوشويربات
مال الظهر من كثرة الحط والشيل
والفكر ضاع ولا بقى فيه المام
يالله ترحم حالة الطفل والجيل
اللي عليهم واجب الدرس الزام
والحمل لامنه تزايد من الكيل
يطفح بكيله قبل يكمل العام
عبدالله حمد الوايلي - حوطة سدير
على رجال العلم حل(ن) وتذليل
لما يكود إصغارنا طيلة العام
نظام حمل الكتب يحتاج تعديل
خله يشيل الكتب لأيام بيام
حق(ن) لطفل(ن) للحمل قاصر الحيل
أما ضياع الكتب أو تتلف تمام
سعود عائش التميمي الحربي - القاهرة
تطوير قالوا قلت يحتاج تبديل
طفل نموه ما كمل جلد واعظام
والاختصار يفيد من دون تحليل
والاختبار يعوض النقص واختام
راي المعلم فيه كل التفاصيل
الوضع يحتاج اجتماعات وإعلام
فهد بن عقيل الطويان - بريدة
بيت الاسبوع
نبتهج فرحاً الاسبوع القادم إن شاء الله بذكرى البيعة لخادم الحرمين الشريفين وسوف يكون بيت الأسبوع حول هذا الموضوع الهام وتلك الذكرى الطيبة أعادها الله سنين عديدة وهو بخير وعافية- حفظه الله.
والبيت يقول:
بلسان واحد شعب شبه الجزيره
لك يابو متعب بايعوا سر وجهار
نستقبل صدى البيت حول موضوع البيعة لخادم الحرمين الشريفين الملك عبدالله بن عبدالعزيز آل سعود حفظه الله وذلك على الفاكس 014871070 أو الايميل rb-khozama@alriyadh.com مرحبين بمشاعركم تجاه فهرس المراجل.