مرحباً بالعاهل المحبوب مد الله سنينه

أبتدي بسم الله اللي كل الأمة مرتجينه
الكريم الواحد المعبود علاّم الخفيّه
أحمده واثني عليه الخير كلّه واستعينه
طالب التوفيق والتسديد من رب البريّه
من هداه الله على التقوى وطاعة والدينه
بشّره بالخير كلّه فالحياة الدنيويّه
بعد هذا .. مرحبا ترحيبةٍ حلْوه رزينه
تشرح صدور الرجال أهل الوفا والمقدريّه
مرحبا بالعاهل المحبوب مدّ الله سنينه
عارف الواجب عليه وحافظ حقوق الرعيّه
مرحبا بك فالرياض ومرحبا بك فالمدينه
مرحبا في مكة أم الخير في صبح وعشيّه
ألبسك مولاك ثوب العافية صحّة وزينه
وألبسك مولاك تاج العافية قسم وعطية
دام عزّك .. وأصلح الرحمن ما بينك وبينه
ضاعف الله حسنتك وطهّرك من كل سيّة
يا عسى ممشاك في درب الهداية والسكينه
خطوة ترفع درجك وخطوةٍ تمحى خطيه
ياالزعيم اللي تخوض البحْر وتقود السيفينه
عن صريم البرد كِنّ وعن لهيب الشمس فيّه
مؤمن ٍبحوار الأديان السماوية بدينه
مالك قلوب البشر بالطيب والنفس الرضيه
هكذا رجل السلام اللي قراراته بحينه
المليك اللي جميع مبادراته عالميه
يا بلادي يا منار الهديّ يا الدرع الحصينه
يا بلاد النور والإيمان ورجال الحميّه
ارقدي بأمن وسلام وخير وانعام وسكينه
في ظلال الفارس المغوار محمود السجيّه
طبّق الشرع الحنيف وجاك بسيوفٍ سنينه
تحت راية( لا إله إلا الله )الخضرا العليّه
حكْمنا حكْم الكتاب اللي نهلْنا من معينه
شرْع رب العالمين وسنّة الهادي نبيّه
في جوار أطهر ثرى وأقدس مكان مقدّسينه
مكة الإسلام والإيمان والنفس الزكيّه
ديرةٍ فيها الوفا والخير والأيدي الأمينه
والله إنّا ما نعرْف التفرقه والعنصريّه
الوطن غالي علينا من يساره من يمينه
من خلافه من أمامه من هناك ومن هنيّه
الوطن نفديه والأرواح في حبه رهينه
لأجل ذلك ندفع الأرواح من دونه هديّه
نارد الموت الحمر وندوّره ونقول وينه
بين قصف الطايرات وبين ضرب المدفعيّه
في قيادة خادم البيتين يا ربي تعينه
الزعيم الصارم البتار راع ِ الأوليّه
والبطل سلطان نهْر الجود والخير ومعينه
كل خير يجيك منه وتنهل الكبد الظميّه
كل شبرٍ فالبلاد انجاز صرْح مشيّدينه
للدفاع ومملكتنا دائماً حرّه أبيّه
مجْدنا فوق السحاب وكلّ الأمه خابرينه
والحضاره في بلدنا بيّنه ما هي خفيّه
كلّنا درع الوطن ونعزّه الله لا يهينه
ننبذ الإرهاب ونشجّع وزير الداخليّه
أمْن دولتنا عليه الحرْص بقلوبٍ ذهينه
والتقدم في مشاريع الوطن نقْله ذكيّه
والختام أزكى السلام وكبّروا يا سامعينه
يا صلاة الله وتسليمه على الهادي نبيّه
حماد بن حمدي المطرفي - مكة