عتاب

يا ربنا يا اللي الكل والي
يا واحد(ن) جميع خلقك ترجاك
يا ربنا فضلك كثير متوالي
يا وسع حلمك والمخاليق تعصاك
الخلق تفنى وكلنا للزوالي
أنت ملاذ المستجيرين بحماك
أدمح لنا الزله قديمن(ن) وتالي
واعفر لنا ذنوبنا يوم نلقاك
أنت الكريم اللي على الكل عالي
يالله تشملنا بفضلك ورحماك
يالله صبرني على بعد غالي
اقفى وعقبه صارت دروبي أشواك
ياليت يذكر ما مضى من ليالي
يا صاحبي يا حلو طيفك وذكراك
لو كان قربك ينشرى سقت مالي
وكل ما املك فدا تحت ماطاك
لا ما نسيتك وانت دايم قبالي
تسكن كياني والفكر دون يرعاك
فرقاك طعمه مر ذقته لحالي
منهو على ذبح المحبين وصاك
ارجوك لا تسمع كلام(ن) يقالي
من يوم غبت وعبرتي دوم تنعاك
لا تحسب إني داله عنك سالي
الصد والهجران ما أظن يزهاك
من سبتك ما اظن قلبي شمالي
احس نبضه كل ما حل طرياك
لك صورة(ن) مرسومة(ن) في خيالي
وشلون تبغى القلب يسلى وينساك
أحمد ناصر المحرج