صار الهجر يا غايتي جد

اسالك صار الهجر يا غايتي جد
هجرت من قلبه نبضلك صميمه
صدتك هاذي حاشت الجسم وانهد
كن الضلوع بصدتك ذي صريمة
والقلب كنه من حداهن تشرد
خلا مكانه ما بقى إلا خريمه
هجرك هذا معاد يستوصله حد
خلا الاماني وسط جوفي عقيمه
امسى به الطايف على ما بعد غد
واهتز منه طويق واظهر كضيمه
كذا وفجاءه دونك الباب ينسد
كني مسوي يا غناتي جريمه
ما هيب حلوة منك يا ناعم الخد
تضيم منهو ما رضالك ظليمه
وتهاجر اللي مدلك غايته مد
وترميه ضمن الذكريات القديمه
لكن تدري عقب ما عاد لك سد
روح عسى روحتك عني غنيمه
لو الامل يمكن يعود يتجدد
خوفي تعود ويعقب السيل ديمه
انا بداوي جرحي اللي توقد
لو كان صعبه للقلوب الرحيمه
وانته مدام الحب في نظرتك ند
واصبح بسلمك كالغريم وغريمه
وتجازي العشاق بالهجر والصد
مدري تلاعب بالجروح الاليمه
احسن تعيش بلا محبة ولا ود
بالذات مع ناسٍ بليا حشيمه
مناحي الفرزة العتيبي