سود الليالي

لا صار في قلبك هواجيس واسرار
لا يدري بعلمك من الخلق مخلوق
الا بعيدين الهقاوي والانظار
واحذر لا تبديبه على كل مطفوق
دام الزمن فيه أقرب الناس غدار
احفظ سدودك يالشلي عند ماثوق
واليا جهلت انشد حكيمين الأشوار
أهل العقل والمعرفة مقطع حقوق
اصبر على الدنيا وميلات الأقدار
ويحلها اللي معتلي فالسماء فوق
دنياك هاذي يا فتى الجود مشوار
رحلة غريب نصفها حظ وفوق
وترى الفلك لو سانع الوقت دوار
سود الليالي تاخذ الطاق مطبوق
خلك وسيع بطان لو الزمن جار
قد قال الأول كل مطرود ملحوق
ولا تهين النفس لو صار ما صار
موتك عزيز أخير من عيشة البوق
وترى التواضع يرفع الرجل مقدار
والكبر عنوان الردي جعله العوق
لا شاف ربعه خمته طافي النار
نفسه تسوقه للردى والخنا سوق
ومحد يقول اني ردي قاصر أشبار
ومحد يقول اني على الطيب مسبوق
وكلن يعرف الحر الأشقر ليا طار
ولا يجهل أهل المعرفة كل مرموق
ونور القمر ما غطته كثر الأنوار
وشمس الضحى تشرق على الناس بشروق
وأنا على بدع المثايل والأشعار
أصخر المعنى على كل طاروق
اقطف من غصون المعاني والأثمار
ولا الهزيله ما لها عندنا سوق