يا مصدر أفراحي وبهجة حياتي

إلى أثمن وأجمل وأحب البشر.. إلى بنياتي غيداء، تاله، رسيس وآخر العنقود ليان إلى اللاتي أرجو ان أجد معهن وبهن ما يعوضني مرارة الأيام وصدمات الحياة..
قلت اسمحي لي يالليالي العنيفه
مرت على أيام ما هي خفيفه
ايام سودا في عيوني حفيفه
ياما شربت الهم وطعوني اطعون
الناس ما تدري عن اللي جرالي
الله هو المعبود عالم بحالي
يا رب يا خلاق يا ذا الجلالي
يامن عبادك من عذابك يخافون
يالله يوم العرض تغفر ذنوبي
كل شي عندك للعباد محسوبي
ليا انتهى عمري وقرب غروبي
رحمتك يامن عبادك لك يصلون
احفظ بناتي ياولي الخلايق
بحفظك احفظهن من جميع العوايق
اربع اورود مثل ورد الشقايق
يالله تحميهن من اللي يحسدون
يا مصدر افراحي وبهجت حياتي
يا بلسم اجروحي وكل امنياتي
عندي وصاتن كان حانت وفاتي
وصات منهي شافت الغدر واحزون
غيدا وتاله يا حياتي وقلبي
ليان ورسيس يا حب حبي
سيرن بهالدنيا على نور دربي
سيرن مع اللي في هدى الله يمشون
ترفعن عن كل دروب الرديات
اللي لهن مع كل سيره حكايات
ولا تسلكن ادروب فيها شبهات
يفرح بها الأنذال واللي يقولون
لازم ابوكن راسه يظل مرفوع
لو حدكن ضيم الليالي مع الجوع
يا اربع شمعات مالنا غيرهن اشموع
ياللي غلاكن بالحشى دوم مدفون
نورة التميمي