عودة ولي العهد فرحة كبيرة

لاح الصباح وزج طيره بالأفراح
وهبت نسايم صبحه المستثيره
ياهاجسي حضر ويا قلبي ارتاح
طاب الكرى والخير نادى بشيره
ارقص طرب واشعل دجى الليل مصباح
نوراً يبدد كل هم وحيره
اليوم زان الكيف وإلا التعب راح
عودة ولي العهد فرحه كبيره
عاد الأمير ولاح برق السعد لاح
بعيون ناس من غيابه سهيره
ياميرنا والحزن للشعب يجتاح
ياميرنا رحلتك ماهي قصيره
كل العيون بغيبتك دمعها ساح
هلت سحايبها مزون غزيره
ياروح ياللي تسكنك كل الأرواح
من حبها ترحل معك كل ديره
يامرحباً حييت يا سيل الأمداح
ياللي كرم كفك يكفي عشيره
كف تغيث ابلاد وتداوي اجراح
وتسعد نفوس من عوزها ضريره
لك في سنام المجد غدوه ومسراح
وسطوة تخلدها السيوف الشطيره
واخوك سيف العز للضد نطاح
سلمان وأفضاله علينا كثيره
تباشري يانجد مع نور الاصباح
من بعد عاد لنجد سلمان أميره
عم الفرح والصدر من نشوته فاح
عطر حروف الشعر بأزكى عبيره
بقدومكم تشتت الهم وانزاح
والنور عاد وساد شبه الجزيره
انتم هل العوجاء ليا صاح صياح
أفعالكم تحكي بها كل سيره
من غيركم يامروية علط الارماح
من غيركم خلى الكبيره صغيره
يابناء الزعيم اللي عدل هوج الارياح
حتى صفت للناس خيراً وخيره
عبدالعزيز اللي لبس مجده وشاح
ولا أحداً رقى في قمة المجد غيره
أقام صرح العدل للناس ماطاح
عساه بالجنه يلاقي مصيره
عبدالله بن جهز العضياني