صوت الصورة

سوق التمر معروف كلن يجيله
يربح به الدلال هو والمحرّج
والسكري مرغوب لا تدور بديله
حلو المذاق وعلى أشكاله تفرّج
سبيتان شرار العنزي، بريدة
يا حظ وشفيك ردي اليوم ما من سوق
أبيع برخص سعر محدن يراعيني
واقف على موتري واشر لكم من فوق
يا جعل حظي يقوم اليوم يرضيني
عبدالرحمن عبدالله الشمراني، الرياض
خايف على التنده وخايف على الثوب
وإلاّ أنت يبن العم خايف تطيحي
حرّج يبو خالد ترى الوقت محسوب
راع التمر لابعت له يستريحي
فهد بن عقيل الطويان
من فوق تندة موتره طوح أصوات
من يشتري هالزين ياهل الكنيزي
هو مطعم الأجداد في عسر الأوقات
والله ذكرها في كتابٍ عزيزي
سعد الحماد
رقيت في عالي وعانقت الأنوار
ورفعت صوتي وأنا واقفٍ فوق
التمر طيب يا بخيصين الأشوار
والله لا بيع كان مازاد مخلوق
حمد عبدالله الوايلي
اللي يبي قنو تمراً زين
يقدع الضيف ويفيده
حراج واحد حراج اثنين
في برحة التمر ببريده
جهز بن سيف، الرياض
دلال أحرّج مطمعي
أسعى على رزق العيال
هو غايتي من ها السعي
والوقفه من فعل الرجال
سليمان بن عبدالرحمن المحيميد، الشيحية
واقفٍ على التنده واصرخ بعاليه
يا راعي التمر اعرف وصوفه
السكري معروف محداً يخليه
وقف بدور.. ورتب اصفوفه
عبدالرحمن محمد الفارس، الرياض
المحرج طالع فوق الغماره
من يسوم التمر هذا من يسومه
سكري.. وخلاص.. منقي عراره
من صلاة الفجر يبدأ السوق يومه
عبدالمحسن بن محمد المحيسن
حان وقت التمر.. حان وقت بيعه
فرصة الدلال ياخذ كسب ايدينه
التمور منوعة شقر وربيعه
بالقصيم السكري محلاه وزينه
عبدالرحمن بن منصور التركي، البكيرية
حراج وحده والعرابين باللف
عندي قدوع الكيف متنايرينه
التمر طيب والمحرج توقف
واللي يزود في الثمن بايعينه
فرحان مسفر الدوسري، السليل
الله بسطها لكل الناس
ولا ومر بالتخاليفي
والمروحه لا تصيب الراس
الدنيا ما هي على الكيفي
عبدالكريم عبدالرحمن السلوم
كم نقول بها التمر يا مشترينه
كم نقول السوم يا سواماها
سكري ومن عنيزه جالبينه
تو ما فكيت قناة اكمامها
محمد بن فهد الجلعود، سميراء
ياللي تحرج واصبعك
سبابة اليسرى تشير
على الجمهور يسمعك
سعراً تفرح به وتطير
محمد بن عبدالله بن حسن
صورة العدد
نرحب بمشاركاتكم الشعرية على الفاكس رقم (4871070)
أو الايميل الخاص بصفحة الخزامى:
rb-khozama@alriyadh.com
زاوية: (صوت الصورة).. ويا هلا