صوت الصورة

عشرين دور وعلقوا فيه مليون
النايفه تلبس على الرأس طربوش
واعزتا لك يالعماره بلا لون
ضاعت ملامحها مع أطباق ودشوش
سعد الحماد - روضة سدير
مثل الخلية هالعماره بالأطباق
بث الفضا مع القمر يسحبنه
لولا اختلاف الناس رغبات.. وأذواق
للكل يكفي سلك يتوازعنه
فهد بن عقيل الطويان
الدش راهن في دخول المنازل
واليوم حقق مبتغاه ووصلها
واللي نشوف اليوم هو غزو شامل
ما كنه إلا النحل تجني عسلها
صالح علي المرفدي - القطيف
البرج غطت قمته وارفع أدواره
أطباق دشٍ صار كنه خرابه
صورةٍ فيها كبير الإشاره
الدش حتى أفقر الناس جابه
سعود عائش الحربي - جدة
بعض الظواهر لو تفشى غريبه
شوفوا هل المبنى لا يمكن يطلون
يمكن هوس لأجل الدراما العجيبه
ولا تسابق في مشاهد سباستون
حاتم نايف الحبردي - الرياض
يا هل البناية كيف بالله تعيشون
كلش مغطى بالدشوش وغثاها
هذا مرض معروف وأنتم تعرفون
لامن هوا وأيضا كثيراً بلاها
محمد بن عبدالعزيز الخنيفر
رصت أطباق بعماره
فوق جدران تواما
كل صحن في مساره
تشبه طيور الحماها
حمد عبدالله الوايلي
بعض الفنادق لها عادات
تجذب بها كل سوّاحي
أوهمّهم رفع الاجارات
ما همهم تجلس أو ترتاحي
عبدالكريم عبدالرحمن السلّوم
العماره من أهلها يا عرب كنه تصيح
تشتكي جوراً عليها من سكانه والدشوش
اظلموها بالملاهي إن كان المشهد صحيح
والنتيجه النتيجة: الوقت ضابع والقروش
محمد بن عبدالله بن حسن - الدعيسة
أنا أشوف لي، شكل غريب ولا هو زين
برأس العمارة ما درينا مناحيه
تقول إنها بتهد أوفوقها تزيين
حقيقة يحير شكلها في علاويه
مبارك محمد طرجم الدوسري
الله من هو ملك له عماره
وصاء على نصف الدخل للمساكين
واللي بقاء بمسجدن وسط حاره
من شان يدعي لي جماعه مصلين
عبدالله الحامد - الرياض
خذ اعتبارك من الدنيا ومنشاها
العامل اللي نظر في موضع أقدامه
عمارةٍ شيدت يا زين مبناها
يوم اكتمل بنيها يبدأ تهدامه
فرحان مسفر الدوسري - السليل
نرحب بمشاركاتكم الشعرية على الفاكس 4871070
أو الايميل الخاص بصفحة الخزامى:
rb-khozama@alriyadh.com
زاوية (صوت الصورة).. ويا هلا.