يكفيك ربّي الصواديف

يا سيدي يكفيك ربّي الصواديف
وكفاك شر مدبرين الخيانه
شراذم الإرهاب سوّت مخاطيف
وعليك من رب البرايا حصانه
سلامتك عيد القلوب المواليف
لك في قلوب الشعب قدر ومكانه
جدك معزي كامل بالتواصيف
وحّد بلاده واحتضنها حضانه
والمملكة عدّت طوال المشاريف
تحكم بدين الله أفضل ديانه
حكامنا ريف الركاب المواجيف
ساسوا الرعية بالعدل والرزانه
صانوا الأمن في المدن والبر والريف
امأمنين (ن) واحفظوا للأمانه
حنا سعوديين مابيننا ضعيف
حزّت حزم كلّاب سيف وزانه
طبع السعودي يكرم الجار والضيف
ولاجاء الحزم والعزم مافيه دانه
والمملكة ماوحدت بالسواليف
ياللي مع النعمة لقيتوا لبانه
بالله تصدوا بالسيوف المراهيف
للي رضوا لبلادنا بالطمانه
وموت الفدا لبلادنا موت تشريف
موت بعز ولاحياة المهانه
أبكم هل العوجاء هل الدرع والسيف
حصون الوطن صانوا بلدنا صيانه