في ظل أبو متعب نعيش بساقته

الشعر ياهل الشعر حانت فاقته
ولا خير في شعر على غير اتجاه
اتعب على بدعه.. وانقي باقته
لو كنت اجيبه من نحت صم الصفاه
اكبر من طروق الشعر وسياقته
ما شفت من جرم الغدر عند الطغاه
شرذمة دم الوطن اراقته
دستورها تكفير مدّين الصلاه
لو كان تجهل طعم جرم ٍ حاقته
ماكان وجه الليل يسترها دجاه
لعبت على خبل.. جحد علاقته
غاوي دليل ولا درى ويش السواه
قام يتمايل من طرب طقاقته
كرس لها بين المهالك ما جناه
خاوي فكر.. لو تجذبك لباقته
مثل الضرير اللي فقد نفعة عصاه
اعّيا طبيبه .. من بلا حماقته
وازهق حياته من خبث فكر ٍدعاه
نوّخ بعيره.. يوم ضيّع ناقته
لفت عليها ام الكباير من رداه
ام الكباير من رداها ساقته
في ذمتي من ساقته يمهن ثواه
ماهوب منّا.. كنسلوا بطاقته
ممهون خيّر من نكث بيعة ولاه
جعله فدا راس الوفا وعماقته
اللي على درب الوفا عطر ٍ نباه
روح الامن.. امن الوطن في ساقته
حامي بلاده ما توانى من وفاه
حر مواكير المعالي تاقته
يشلع لها يوم الردي تقصر خطاه
لا ما تخاذل .. ما يوّفر طاقته
لين خضعت روس الاعادي من دهاه
وجه ٍ تباشير السعد طلاقته
غنالها من زود ما ردت صداه
رايه سديد .. وميزته حذاقته
تعطيك نبذه عن مفاهيم الحياه
ليث ٍ تدابير العدا ما عاقته
يسوق عمره فوق كفه من صخاه
هذا محمد .. من طغى بشقاقته
السيف الاملح كان ما عوّد دواه
من راس شيخ ٍ سيرته سبّاقته
تاريخ مجده .. منْحصر عند الرواه
نايف .. نواميس الفخر عشّاقته
سيّد مقاديم العرب واده الدهاه
مزبان .. من كف الشقا .. طرّاقته
يبشر بعزه لا زبن منها ذراه
حاكم .. حكيم ..الطايلات .. شفاقته
شيخ ٍ مداغيش الوغى ترجي رضاه
وحنّا على عهد الوفا وثّاقته
ما نختلف مدامنا قيد الحياه
في ظل ابو متعب نعيش بساقته
اقولها والسيل ما يلحق ثراه
جزاء البقمي