اللغز

الأسبوع قبل الماضي كان لغز الأسبوع من طرح الشاعر محمد غازي النفيعي من أبوظبي والذي لم يتوصل لحله الأسبوع الماضي أحد من الشعراء، وقد أعدنا نشره مرة أخرى الأسبوع الماضي واللغز يقول:
يا ويش ثنتين بلا أزواج واخوان
لا أم لا أبو والهن جماعه
أولهن اللي دمعها فوق الاوجان
والثانيه ما تنسي كل ساعه
وقد توصل للحل شعراً:
الحل عندي دون زود ونقصان
وقت الصلاة نقول سمع وطاعه
القبلتين إلهن معزه ولهن شان
مكه والاقصى عندي اكبر بضاعه
غنام عبدالله الغنام - الخرج
أرسل لك الأبيات وأنا بجيزان
مشاركه من طيب بال وقناعه
القبلتين الحل يا عالي الشان
أشرف بلاد الله وأطهر بقاعه
فواز عبيد آل بيوض - جيزان
أهلاً هلاً واهلين باللغز لا بان
باهل الكرم والدين واهل الشجاعه
القدس والكعبه وللغز عنوان
كتبت أنا حله ولا هي اشاعه
عبدالله الصالح الأطرش - الرس
القبلتين الحل يا طير حوران
وقول جاك الحل سمع وطاعه
الأوله من حولها قوم عدوان
والثانيه نستقبله كل ساعه
محمد أبودحيم - البدائع
يا مرحبا بك يالعتيبي ولا هان
لغز بدعته نلتفت له بساعه
القبلتين الحل ياطير حوران
أقولها والكل قدر استطاعه
صلاح بن عبدالله اليابس - رحيمة
تحية مني ومن كل الأخوان
للي سنا لغزه منور شعاعه
القبله الأولى لها ماض الازمان
والكعبه اللي قربها فيه طاعه
علي رشيد الرشيد - رياض الخبراء
ياللي طرحت اللغز مشكور ومعان
اللغز وافي فيه فن وبراعة
القبلتين إن كان ماني بغلطان
هذا اعتقادي وانت راعي البضاعة
علي سليمان الغزواني - الرياض
لغز الأسبوع
كتبه للصفحة الشاعر عبدالله الصالح الأطرش من الرس ويقول:
ويش البنات اللي كثيرات واحشام
الاسم واحد والخطا ما نجيزه
البعض منسوبه نسبها للارقام
والبعض منسوبه لاسامي عزيزه
نستقبل الحلول على الفاكس
4871070أو الإيميل:
khozama@alriyadh.com
كما نرحب بطرح الألغاز الجيدة والجديدة.