فلاش

رحت الأسبوع اللي طاف "لأم رقيبه" حول حفر الباطن.. وعزمونا مجموعة من المعارف.. وبعد القهوة.. وعلوم الرجال والقصيد.. والعشاء الدسم..
المهم.. قبل أمشي مسكني واحد من اللي كانوا حاضرين السمرة.. قال والله أني مستحي.. لأفاتحك بالموضوع.. بس يقولون الكلمة اللي تستحي منها بدها..
قلت سرك بير وابشر باللي تبي.. قال عندي ولد اخوي (ابوه متوفي) بعد ما تخرج من الثانوية قدم على الجامعة ولا قبل وأرسلته يدرس بأمريكا.. وجلس حوالي سنة وشوي هناك.. المهم جانا بعد هالمدة مدمن مخدرات الله لا يوريك.. وأزعجنا وأزعج أمه وجابلها الضغط والسكر.. لا وبعد يهدد خواته وقالب حياتهم جحيم..
وأنا يا أخوك.. خايف يجيب الطعه.. وديته لمستشفى الأمل.. ولا قبلوه يقولون ما فيه سرير..
وانتم يا حقين المكافحة والله شغلكم سنع.. والله يقويكم ويعينكم وبلدنا والله مستهدف وإلا.. ما كنا نسمع بهالبلاوي قبل، وهالحين أبي فزعتك يدخلونه المستشفى.. قبل لا يضيع ويجيب لنا مصيبة..
شفتوا يا ناس.. لا الوقت.. ولا المكان مناسب ان هالرجال يشكي مصيبته علي ..بس ولد أخوه مشغله وشايل همه.. ومدمن المخدرات مشكلته ماهي على نفسه وبس.. لكن حتى على أهله وجماعته.. ويالله سترك.
الابرق