صوت الصورة

لاواهنيك يوم تجلس بشبراق
نوبٍ ظلال ونوب لفحه من الشمس
عقب التعب والكد في جلب الأزراق
أحسن من الفندق مع نجومه الخمس
عبدالكريم التغيمشي - الربيعية
ضيع طريقه والحرارة شديده
وتحت الشجر جالس يحسب خطاويه
بارضٍ خلا ما حوله اللي يفيده
غير الذيابه ودها تختلي فيه
عقلاء خزن العنزي - تبوك
بعد التعب بالظل ريح عن الشمس
إلى إنتهى واجبك محدٍ يلومك
صم الحجر من شدة الشمس منحمس
الصحة أبداً لا تغرك حلومك
فهد بن عقيد الطويان - بريدة
يا وجد حالي على دلهي
يا وجد من ضيع المالي
عن العمل ماني بولهي
وأعاني من ضيقة البالي
سبتان بن شرار العنزي - بريدة
بنت الحصاري ووردة تحت ذي الكينا
غطى نبات البرار فوق ذي الثيل
والعامل اللي جلس كنه ينادينا
لولا كمرت المصور كان قد قيل
سعود عبدالعزيز الهزاع - نعام
في الظل أروق شوي وتروق الروح
ظل وسعة بال وبراد ورواقه
لولا العمل والبيت ما ودي أروح
فكري له هنيا فضى وإنطلاقه
عقاب بن سقيان العتيبي - الجمش
يا زين ظل الشجر زيناه
لا صرت منهك وتعباني
واللي يقص الشجر يمناه
تعطى البلا أول أو ثاني
عبدالكريم بن عبدالرحمن السلوم - القرائن
يا صاحبي أصبر ترى صيفنا حر
وما عقب حر الجو الا براده
أهوى مرابعنا ولو ظل في بر
والكل منا تستميله بلاده
سعد الحماد - روضة سدير
بعد التعب والجهد محتاج راحه
وخضره على خضره تجيب الوناسه
قدم المصور يبتسم في سماحه
والهم من كثر الهواجيس حاسه
حمد عبدالله الوايلي - حوطة سدير
قيضٍ حداني مع كفيل تقفان
في ما قعٍ ما بين طرشٍ وذيدان
يالله تغيث الناس في كل الأوطان
وأرحم مساكينٍ على جور الأزمان
عبدالمحسن بن محمد المحيسن - رياض الخبراء
ما أروح بعيد عن داري القطيف
ديرتي وغيره فلا أعشق سواه
وما يروق البال والجو اللطيف
بغير ديرة هلي ونسمة هواه
محمد بن عبدالعزيز الخنيفر - أشيقر
يا ما حلا المجلاس في ظل الأشجار
والجو صافي والنسايم عليله
ترى مصايفنا جميلات وكثار
صارت مثل ما قيل شيله وقيله
زبن مقبل العنزي - بريدة
غريب جالس تحت الشجر
داخل متسلل وسط البلد
ما معه إثبات ولا كرت السفر
البلد فيها نظامٍ يا ولد
خليل التميمي - الرياض