ريح المطر

عسى الخيال اللي تكاشف بروقه
من قبلة ومرتكيلة هوى الشرق
ريح المطر مسبق في سبوقه
ورزم رعوده مع بعض مابها فرق
يسقي وطنا من صدايق حقوقه
يسقيه حتى يرتوي يابس العرق
ويالله ياللي كل شيء تحوقه
وما فيه شيء يدرق عنك بالدرق
تخارج الأمة خراج أنتوقه
من ظاهرة الحسد والنم والسرق
وتغسل دما المرضان داخل عروقه
من الوباء المنتشر داخل الشرق
الناس للحسنات تجمع شفوقه
وفي لحظة تحرق مواثيقها حرق
وترى المطر ما فيه عايق يعوقه
إلا الذنوب اللي تغطي على البرق
وترى الغلاء ما فيه شيء يسوقه
إلا البذخ والسرف ومحارب العرق
والناس في حاجة تأمل وفوقه
والظاهر أن الوضع فيه مفترق طرق
والواضح أن الكل يعجز يطوقه
أما رجعنا أو نبي ندفع الفرق
والطلع لا ما جات حلوه عذوقه
إعرف ترى فيه الوباء مارق مرق
تركي بن مدعج الدلبحي