تجي (تسوقه) يسوقك.!

سكر في مويه

في هذه المساحة، أحب أن (أتبَحبح) يوم الجمعة، أفرد الذراعين.. وأغمض العينين.. وأقعد بجوار (الموقد)، في الركن ذات (المقعد)، لأستشعر معكم متعة الإجازة:
- ... فين طريقك فين
بيروحوا له منين؟
- وإنت مالك؟! روح في حالك!
- مر ظبي سباني
حين نظرتُ العشية
- خلِّصنا يا (محمد زوِّيد) وقول إيش تبغى؟!
- أبغى سلامتك.. وكُبر عمامتك!
- العمامة سيبنالك هيَّه.. وإذا كان تبغى كمان (الكُفيَّة) خدها وريِّحنا.!
قال الفاضي، بعد أن ضمَّ إلى صدره يديه .. ومَرءجَح رأسه بين كتفيه، على طريقة أفلام (الخمسينيات) الهندية:
- بسء لو تبُل ريقي بكلمة حلوة!
- عندك تلاجة (السبيل) .. بلء ريقك منَّها!
- (التلاجة) ما تبُل الريق!
- أجل تبغى تبُل ريقك من فين؟!
- من (البوتوجاز)!
- إنت بتستظرف؟!
- لا .. أنا مستلطف!
- هيَّا أقلب وجهك.. ما أبغى عيني تشوفك
- حرام عليك..
تبعت عينيك
تشغل عينيَّه
طول الليالي..
حاولت أخبّي
حبَّك في قلبي
لا يبان عليَّا
طول انشغالي..
- الله يشغلك في نفسك يا بعيد!
- أبشِّرك أتقاعدنا.. لا شغله ولا عمله .. ولو تؤمروا اشتغل عندكم (سواق) أنا جاااهز!
- إنت يبغى لك اللي يسُوقك.!
- زي بعضه.. مَرّه إنتَ تسوق ..مره أنا أسوق ..مرّه تُنزُل السوق ..أنا من يدّك دي ليدك دي.!
- تنكسر يدّك يا بعيد.
- تفداك.. وإذا تؤمر على الراس والعين برضه تفداك.!هِيّه العيون إيش لها لزوم إلا شوفتك:
أشوفك كل يوم وأروح
عسى النظره ترد الروح
- إنت دايمنّك قلبك مجروح ومفتوح 24ساعة زي القنوات الفضائية.. وعيونك تبلبص وتغمِّز زي (إتريك) البلدية.. ورقبتك دايرة زي (معصرة) زيت السمسم.. إنت ما تنام؟!
- مين يجي لُه نوم
ويسيب الحلاوة ديَّه؟
مين يجي له نوم
ويسيب الطَّعامة ديَّه؟
- لا حول ولا قوة إلاّ بالله .. أسمع
- نعم يا حبيبي نعم
أن بين شفايفك نغم
أيَّامي قبلك ندم
وأيَّامي بعدك عدَمء
- عِدِمتك، يا بعيد
- مقبول منَّك كل شي مقبول
مقبول حتى لو عذابي يطول
- والنهايه؟!
- الله لا يجيب نهايه.. نحنا لسَّع في البدايه!
- غلَّبتني.. يعني صحيح تبغى تشتغل سواق؟
- إيوالله.. هادي طموحاتي من زمان.
- طيِّب عندك شهادة؟!
- لا ..
- عندك رخصة قياده؟
- برضُه لا..
- أجل إيش عندك؟!
- عندي ذوق .. وعندي نظر!