يالوضح ماحدك على حاجر الشيح

ومنابت الحرمل شمال المسما
وهاك الخشوم الي حصاها صلافيح
الا الزمان الي ماهوب اخو شما
البر ضاق وضايقوك المشافيح
واحتدك الضامي على الي مضما
مير اطلبي منشي السحاب المراويح
يرزقك رزاق المخاليق لما
بمزن يجي من يمة الغرب طفيح
وليا ومره الله رعد ودلهما
نو عروض للرعد فيه تسبيح
اليا توهل عالية نجد سما
مدة كريم ساقها مرسل الريح
من حد كشب للوريعه وحما
قدمه ربابه كالنعام المشاويح
ربد تقول اقطاع بدو تلما
فيه الرعد كنه مصلي التراويح
اليا قرا صورة تبارك وعما
ياخذ شهر وثعول وبله مدابيح
نوب على الهادي ونوب يتحما
يغنيك عن مرتع قراش الفلا ليح
الي دبشهم هامل ما يضما
واسلاك شايكة تجرحك تجريح
وارض بها اكياس النفايه ترما
شعر - عبدالله بن عون