في صفحة «خزامى» نشوف الركايب هذا هو التاريخ ماضي ومعروف

شدّ الرحال وجهّز العفش ثم سير
فوق الذلول اللي تواما رسنها
يم المزاين راحلٍ فوقها غير
يالله عسى فاله يعادل ثمنها
خلفة قعود اشقح يبي فوزه يصير
والجايزه ما فيه احدٍ ضمنها
حمد عبدالله الوايلي - حوطة سدير
ما نِقص ذلوله من الحلا شيّ
كمّل حلا بخروجها والسفايف
يَامَا حلا وانته على ارضنا حيّ
على ظهرها سَجِّةٍ والفلا كايف
البلّ لها فضلٍ على ماضي وجيّ
بالسلم ووقات السيوف الرهايف
سعود عائش الحربي - جدة
في صفحة «خزامى» نشوف الركايب
هذا هو التاريخ ماضي ومعروف
لاجيالنا ماضيه ماهوب غايب
قدامهم في المهرجانات وتشوف
واليوم طيارات فوق السحايب
أمن وأمان ونعمةٍ ما بها خوف
سليمان بن عبدالعزيز السنيدي - الرياض
سفن الصحاري شوفها يسعد الروح
ف أرضٍ فلا يا زين أرض الصحاري
أفرح بها وتشافي حزون.. وجروح
البلّ لها عشقٍ.. وشوقٍ.. وطاري
نورة الفاضل - بريدة
نرحب بمشاركاتكم الشِّعرية، وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
صورة العدد