ماكل هرج نسمعه نستمع له ولا كل من وصِي على الطيب طابي

كان بيت الأسبوع الماضي للشاعر الكبير رضا طارف -رحمه الله- والذي يقول:
ماكل هرج نسمعه نستمع له
ولا كل من وصِي على الطيب طابي
وكان صدى البيت من الشعراء:
يا كثر هرج الناس جده وهزله
لكن ترى المسلم يعرف الصوابي
لو يعثر الرجال في مشي رجله
أهون ولا يخطي يجيه العتابي
واللي يعادي الناس ما احد حسب له
وكل(ن) يبي بعده وعنه اجتنابي
سليمان بن عبدالعزيز السنيدي - الرياض
هرجٍ تسمّع له وهرج استمع له
وخير الكلام اللي نزل في الكتابي
واحرص على هدي النبي واتّبع له
واغلق على هرج القفا كل بابي
بعض الهروج تجيك من واحد ابله
لا تتعب تدور عليها جوابي
والطيّب الا جاك ف أتعب من اجله
تراه في قومه رفيع الجنابي
حسن بن صحفان - خميس مشيط
من لا يصدّق ما يقوله بفعله
هذاك عنه يْقال مثل السرابي
واللي إذا سمع النصوح ارتدع له
هذاك يرجى له طريق الصوابي
ما كلّ ما شافه سريع اندفع له
يدير فكره قبل حثّ الركابي
محمد مقحم المقحم-الرياض
الهرج اله ميزان والحق حمله
ولاكل هرج نسمعه له جوابي
لو كان قيل البعض منا يعَبدله
والطيب للطيِب عزاز ومهابي
يتعب له الرجال بماله ورجله
ولا كل من وصي على الطيب اصابي
يزل بالزلات ولاهو تعب له
يعيب له عربين ومثله يعابي
مشعل بن صنت العصيمي- الخرج
والبيت من حكمته نحتكم له
كم من هروج تمر ما لها حل واعرابي
نجمض عليهان فوتها من الوهله
والطيب ما تدركه لو عارضك شابي
يا من تباهى مع اللي زود محتفله
ما يدركه كودشهم له فعول واسبابي
عبدالله حمد الوايلي - حوطة سدير
الهرج يا صاحب رهين اللي فله
بعض العرب هرجه تقل سم دابي
يعطيك من حلو الكلام ما تمله
في مجمله غباش والا سرابي
والطيب للي يبتغي منوة له
تلقاه من طيبه على الطيب رابي
والطيب للي يبتغي منوة له
ما عاش راع الطيب جو الضبابي
صالح بن إبراهيم السنيدي - الحرييق الوشم
هرجٍ يناسبنا و هرجٍ نتله
ولا نصاحب فالملا شخص هابي
يا الله تحمانا من الباس كُله
امشي معَ الجواد وحسب حسابي
ارافق الطيّب واجي مثل ظله
وقت المجي ولا بوقت الذهابي
محمد عبدالله الشهري - مكة المكرمة
صحيح ما قاله رضا في محله
هذا ترا بالفعل عين الصوابي
بيتن حكيم وسامعه ما يمله
قاله وسيع العرف سمح الجنابي
اللي عسى ربي بظله يظله
عن حر صلو النار يوم الحسابي
سعود ثواب المطيري - القصيم
كلام يلقى بالضماير محلٍ لِه
وكلام ما له لو سمع اي ترحابي
وكم نِصْح طِيبٍ بالأثر مِثْل قِله
ويرهم ليا المنصوح سَمْح الجنابي
سعود عائش الحربي - جدة
المرجله بالفعل ما هي بسهوله
والزين يظهر في المواقف الصعابي
الصاحب اللي وقت ضيقك حمّيه
تلقاه لك سندٍ ولو كان غابي
أما الردي لو زاد هرجه وتاليه
يكشفه فعله بين كل الصحابي
مروة بنت محمد الصديان - مملكة البحرين