السفره اللي للضيوف صنعوها كم قلطوا فيها من الحيل والخير

أحلى السفر بيدينها بنت البلد
سفر باحجامٍ على ذوق الجميعي
في كل اتقانٍ مِن الجد اِلولد
فيما مضى كنا بفضل اللي سميعي
باليد نصنع كل حاجات البلد
مشهد جميع اللي نرى وسطه طبيعي
سعود عائش الحربي - جدة
السفره اللي للضيوف صنعوها
كم قلطوا فيها من الحيل والخير
بلوانها يا ناس قد علقوها
تصنع بالأيدي ما صنعها حدٍ غير
حمد عبدالله الوايلي - حوطة سدير
شوف السفر متعدد ألوان وقياس
تعمل حصيرٍ كل يومٍ وليله
بنت الرجال وفعلها يرفع الراس
تحيي تراث أجداد مشرق لجيله
في شغلها للخوص تسعد لها ناس
وتطوي الحصيره كنه طوي الجديله
خالد بن ناصر المخيمر - روضة سدير
السّفيفِ مْنَقّشٍ يعجبك زين ألوانه
رح وخذ لك سفرةٍ من هالمكان الزيني
لا تقطّع لك صماطٍ متعبٍ باثمانه
وتْغدي بالصرف مسرفْ مثل هالتاليني
السُّفر حفظٍ لزاد العالم الجيعانه
أتذكّر نفع ها السفرةْ بماضي سنيني
محمد مقحم المقحم - الرياض
لقطه تناسب عامنا في شكلها
عام الحرف اللي بيدينك يا لقرمه
تسلم يمين أبدعت في عملها
وتسلم يمين صورت هاك الحرمه
الخوص با ألوانه يميز شغلها
زبيل يفرق عن خويه بجرمه
اما السفر متنوعات (ن) شكلها
شي(ن) مفلول وشي(ن) مبروم(ن) برمه
صالح ابراهيم السنيدي -الحريّق
نرحب بمشاركاتكم الشِّعرية، وما تلتقطه عدساتكم
من الصور الهادفة والطريفة على إيميل الخزامى:
rb-khozama@alriyadh.com
صورة العدد