الطيب مايقبل ردي الهقاوي وترى الردى يصعب على راعي الطيب

كتب بيت الأسبوع الماضي للصفحة الشاعر حمد عبدالله الوايلي من حوطة سدير والذي يقول:
الطيب مايقبل ردي الهقاوي
وترى الردى يصعب على راعي الطيب
وكان صدى البيت من الشعراء :
طبايعٍ ولا تجي بالمناوي،
مخلوقةٍ في الآدمي تقْل تركيب.
ولا لنا في الناس حق ودعاوي،
من طاب احبّوه الربع والاجانيب.
الشعب كله ما يصير متساوي،
وإعرف دروبك بانتباهٍ وترتيب.
محمد مقحم المقحم - الرياض
ليتِ الجمايل وِزّعتْ بالتِّسَاوي
وياليت خلْقَ الله جميعًا على الطيب
وِيْصِير ما فينا ردِيّ وْشِقَاوي
ولحْد (ن) شكا همٍّ ولحْد (ن) شكا شيب
لكِنّها ما جاتِ حسْبِ الهَقَاوي
يا كِثْرِ منْ هَقْوَاتِنا فيهم تْخِيب
ناصر جمعان آل عوض - وادي الدواسر
الطيب ماهو شيلةٍ بالغناوي
وكلام مصفوفٍ بدقة وترتيب
الطيب له دربٍ صعيب المطاوي
مايوصله رخوٍ ضعيف العراقيب
والطيب لجروح النشاما يداوي
مثل العلاج اللي يبي فهم تطبيب
عبدالله عبدالمحسن العبدالكريم - الرياض
ردي الطبع مايفيده مداوي
وما ينفعه لو يشرب الطيب تشريب
ردى النفس دوم شر متقاوي
خيره قليل وفعول تنتج تخاريب
انشهد ان الطيب ماهو هقاوي
الطيب منبع من جدود واقاريب
صالح بن إبراهيم السنيدي - الحريق الوشم
والطيب من كريم ماهو بخافي
وترى الردى ياصاحبي يطرد الطيب
عبدالله السلطان
ما للردى مكان في خانة الطيب
وبالردى تتعب جميع التِّطابيب
وراع الردى ما هو على الطيب قاوي
يبيه وتردِّه جذوره بها00 عيب
واطلب اللي كلٍ اِبْفضله رجاوي
يجعل لنا مِن كل طِيبٍ نِصيب
سعود عائش الحربي - جدة
ياخوي لا تصحب ردي يراوي
إلى بغيته لا يودي ولا يجيب
واحرص على الطيب رفيق النداوي
اللي يفيدك بالمواقف بترتيب.
علي الرشيد - رياض الخبراء
المراجل ماتجي يم غاوي
تا جي لرجالٍ من الله قريب
واللي على فعل الكرامات ناوي
والله جعلّه فالشهامة نصيب
في منزله كم ضيف ياتيه ضاوي
والطيب لهل الطيب ماهو غريب
محمد عبدالله الشهري - مكة المكرمة
ردي الهقاوي ماهو لطيب متساوي
وراع الردى ماله مع الطيب انصيب
الطيب وهبة من الخالق امر سماوي
يصعب على الرديان فعل المواجيب
صالح البشري - الرياض
بيت الأسبوع
كتبه للصفحة الشاعر عيد فريح الفاران من حائل ويقول:
البر زان وفاح ريح الفياضي
والعشب من هتان الامطار رويان
نستقبل صدى البيت المطروح خلال
ثلاثة أيام من نشر البيت المطروح
على إيميل الصفحة:
rb-khozama@alriyadh.com