طيب إنك تفتخر في فعل أبوك بس الأطيب قولهم ذاك ولده

كتب بيت الأسبوع الماضي للصفحة الشاعر محمد الذرعي من حايل، والذي يقول:
طيب إنك تفتخر في فعل أبوك
بس الأطيب قولهم ذاك ولده
وكان صدى البيت جميلاً ورائعاً من الشعراء:
يامحمد مثل صاروخ المكوك
اقصد المعنى وسبك المفرده
شينها لا جا الولد عفن وفكوك
والابو بالطيب نار موقده
عبد العزيز الصقيري - حايل
المعاني واضحه مابه شكوك
فاعل المعروف يبشر بسعده
المجاني لازم انه حوك حوك
بعرف الفرخ القطامي بهدده
خالد ابا قرين - رفحا
الكرم ما ينوخذ مثل الصكوك
نوب نار الطيب غلف يفسده
وان حصل قرم على المركب دكوك
ذاك تفخر فيه ناسه وبلده
خلف السندان - حايل
المواخذ مثل خزنات البنوك
ويفلس اللي راح كده وجهده
احد «ن» ابنه تجذبه طيب الشروك
و أحد»ن» الماخوذ كل يجلده
والزمان يدور والدنيا تلوك
ووين تلقى اللي ماحي«ن»ينقده
حاتم الشاهر - الشنان
طِيب أبوك وسيرته ما ينفعوك
أن خلا مِن حاضرٍ لك يسنده
وترى النشاما بحاضرك يقيموك
والفتى طيبه يجيله بجهده
وليا اجتمع ماضي وحاضر ثبتوك
وطيبٍ على طيبٍ لذكرك خلِّدِه
والناس باللي يشهدونه عاملوك
ويا زين مِن يرفع مقامه في يده
سعود عائش الحربي - جدة
جدك الي قبل أبوك وهم فدوك
فعلهم ماضي وماضي بجهده
وانت عطني وش علومك لا ذكروك
وين فعلك وين حاضر بسعده
لا تفاخر ثم تهايط في ذرا منهم عطوك
كل رجال حاضر وفعله من يده
المراجل ما تغبى ولا فيها شكوك
تظهر الطيب ويبين صيت جهده
حمد عبدالله الوايلي
لولد لا طاب مع طيبه يصوك
يفتخر بفعول منهو قلده
والده مسنده ما به شكوك
من خوال ومن عمام مقلّده
الوسام المشتهر مثل المكوك
داير ٍفوقه ومجده خَلده
مير تال الوقت ناطا فوق شوك
والشباب اليوم مافيه جلَده
مشعل بن صنت العصيمي - الخرج
يا محمد اقول اجتهد مثل ابوك
يفخر بطيبك قبل ياصل للحده
و يعتز لنسابي الى ناسبوك
و كٌلٍ يثابر للجمايل بجهده
و لا تهادٍ ناس قد خاصموك
من لايعدك فانصحك لا تعده
رحب الى الضيفان بالباب نادوك
قدم سمين وسمن واجب معده
محمد عبدالله الشهري - جبل اثرب
نزرع الازهار لو الدرب شوك
ما علينا بالردي لو يجحده
مالكين الطيب بثبات وصكوك
من يسوي طيب لازم يحصده
الرجال بالفعل يذكر وانا اخوك
النعم يقفاه يومن ينشده
عبدالله بن عبود السهلي - الرياض
بيت الأسبوع
كتبه للصفحة شجاع الهجهوج من الرياض، ويقول:
من لا يغبر شاربه عاش مسكين
ياسرع ماتقلب عليه الليالي
نستقبل صدى هذا البيت خلال أربعة أيام من نشر البيت على إيميل الصفحة:
rb-khozama@alriyadh.com