الحزم مطلوب والمولى عظيم بيده أرزاق البشر ومقدره

كتب لغز الأسبوع الماضي محرر اللغز ويقول:
أنشدك عن رجل صعيب يا فهيم
وليا عكست اسمه تشوف الغشمره
سميّه اللي بالخلا دايم مقيم
بعض العرب لاجاه جته الثرثره
أول وثاني حرف جرح ما يضيم
وعن بعض توضيحه نسوق المعذره
وقد توصل إلى الرمعة الصحيحة:
يابو رجا معاني لغزك بالصميم
أمورك العليا دوام امكرره
الحزم حل اللغز والمنطق سليم
الكل حاضر والدلال امبهره
علي الرشيد - رياض الخبراء
أنا قريت اللغز في وجه سليم
وفي بيوت مليانه وفيها ثمره
وأجيب حله يا سميع ويا عليم
تراه حزم صافي مافيه شجره
هذا جوابي واضح ما به كليم
مثل وضوح الجو ما فيه كدره
حمد عبدالله الوايلي - حوطة سدير
لا لقيت اللغز يا إخواني سليم
احترم للي حبكه وحبره
مثل عادي صاحب الخير الكريم
جاب لغز بالخزامى وسطره
والحزم مطلوب والمولى عظيم
بيده أرزاق البشر ومقدره
صالح عبدالله الزرير التميمي - الرس
الحل حزم وجابه الله يا فهيم
والمزح يا رجال جاب القشمره
هذا جواب اللغز واسلم يا سليم
وإن كان ما هو صح أقول المعذرة
محمد بن عبد الرحمن أبو دحيم - البدائع
لغزك أعجبني وفكري به يهيم
وأنت يا عادي لجهدك نشكره
واعتقد حله حزم والله عليم
والخزامي بالصحافه مفخره
صالح محمد البشري - الرياض
اللغز يوم اعملت فكري به مديم
لقيت كلمةْ حِفْظها فيهِ ثْمرة
الحزم ميزةْ حازها الرجل الحكيم
دايم تخلّي الوضع تحت السيطرة
محمد مقحم المقحم - الرياض.
حيةٍ للي بدع لغزٍ سليم
راع الخصال الطيبه ونشكره
اللغز حزْمٍ جاك حله يالحكيم
ينفعك لا صار الأمور مبعثره
سعود عائش الحربي - جدة
لغز الاسبوع
كتبه الشاعر جزاع بن ناصر المفضلي من حايل ويقول:
أنشدك عن رجل مهيب وله دور
شايب ولكن كل يوم يتجدد
أول وثاني حرف لك ود وسرور
وآخر ثلاث حروف وقت محدد
وعكس آخر الثلاث جاء لحن مجرور
يا فاهم بالغطو قل لا تردد
نستقبل الحلول خلال «ثلاثة أيام»
من نشر اللغز على إيميل الصفحة:
rb-khozama@alriyadh.com