الطير الأشقر كاسر الحوم ويحوم فوق الربيع اللي تنامى خضاره

الطير في الصوره جناحينه كبار
من طولها تشبه بنايه شهيره
وسط الرياض وكل من شافها احتار
(المملكه) بانت بوسط الجزيره
والا انتهض أفرد جناحينه وطار
يقطع مسافه من بداية مطيره
سليمان بن عبدالعزيز السنيدي -الرياض
حي الطيور اللي لها بالفضاء حوم
طيور الهداد يا سعد منهو شراها
لاصار وقت الصيد والجو به غيوم
وراحت سموم القيض تمشي وراها
جهز طيوره راعي الصيد في يوم
وراح العساس قدامه يتابع اخطاها
يازين منظرها وهي بالسماء كنها نجوم
ومطعومها من صدور الحباري عشاها
خالد بن ناصر المخيمر- روضة سدير
الصقر رمزٍ من رموز العروبه
اليا كفخ فالجو جاب الفريسه
يعرف مخادع صيدته في دروبه
ريّس طيور الجو محد يريسه
حراب دايم منتصر في حروبه
من عارضه فالجو ممكن يدوسه
محمد عبدالله الشهري- مكة المكرمة
الطير الأشقر كاسر الحوم ويحوم
فوق الربيع اللي تنامى خضاره
بين الشجر مدري الصيد معلوم
وتوه صغير وناشي وسط كاره
غالي على الصقار وينشدالسوم
في خلفه الريشه تحدد مساره
يخشى عليه من الضياع ملزوم
وماشي على التدريب بالشاره
حمد عبدالله الوايلي -حوطة سدير
الحر يشْهر يوم بالحبس قد ضاق
وهجر جلوسٍ طال من فوق الاوكار
ولصيد الخلا بالطير وقتٍ وعشاق
ويحلا ليا جته السحايب والامطار
ياطير شوف الجو بِه ناض برََاق
وايام يحلى الجو وتزين الاخبار
والحر وصفه يبخصه كل عشاق
ويميزه جنحان او مخلب ومنقار
وياما حلى فنجال من قبل الاشراق
في خايعٍ ما داج به كود سبَّار
سعد عائش الحربي - جدة
نرحب بمشاركاتكم الشِّعرية، وما تلتقطه عدساتكم
من الصور الهادفة والطريفة على إيميل الخزامى:
rb-khozama@alriyadh.com