يا زين شوف البر .. جَوٍ وازاهير والبرق لا مِن صار لِه بالسما نَوْض

يا زين شوف العشب وريحة العشب
وشوف الخزامى مزهر ومعطي لون
والذّود يرتع والمراجل لهم كسب
اهل الحلال في كل وادي يهيمون
والجوزان والعشب راوي ورطب
واضح من الصوره ولاهم يقولون
حمد عبدالله الوايلي - حوطة سدير
محتار انا يا ناس في منظرين
الوضح ولا الورد في منبته
ما ودي احط العرب كفتين
ناسٍ تحب الورد في طلعته
وناسٍ تحب الوضح يا عارفين
فيها ا لحليب الزين يا لذّته
بها الشحم .. واللحم للوافدين
ندسّم شوارب ضيفنا ولحيته
محمد عبدالله الشهري - جبل اثرب
شوفوا عطَايَا الله ومعْها المصاغير
ترْعى وِفِير العشب في مِخْضِر الرَّوْض
بالروض تسْعد عِقب جَوٍّ مطير
وتشْرب قرَاح المي ما احْتاجت الحَوض
يا زين شوف البر .. جَوٍ وازاهير
والبرق لا مِن صار لِه بالسما نَوْض
وِليا عطاك الله بعْض المَغَاتِير
سَجْ القِدم معها بِذا الوقت مفروض
سعود عائش الحربي - جدة
ابداع بالتصوير فنان .. فنان
صوره عجيبه من مناظر طبيعه
شوف المطيه والخزامى لها شان
تقطف زهر سبحان منهو صنيعه
يرسخ بذهنك شكلها طول الازمان
ما تنسي يا ناس هذي الحقيقه
خالد بن ناصر المخيمر - روضة سدير
نرحب بمشاركاتكم الشِّعرية، وما تلتقطه عدساتكم
من الصور الهادفة والطريفة على إيميل الخزامى:
rb-khozama@alriyadh.com
صورة العدد