بين الخزامى والنفل وأخضر القاع ونسمة هبوبٍ تبري الضيق والضيم

أنا كل ماهل المطر.. والبراد يجوب
شكى خاطري سجن المدن واطلق قياده
على روضةٍ فيها الخزامى تحد دروب
وراها.. الخضار مع النواوير سجاده
اجيها لجل وضحٍ غلاها غلا المحبوب
على ضيق راعيها.. تجي مصدر اسعاده
لاطق اللبيد وجات من كل حدب وصوب
غيومٍ.. حوافرها على الأرض.. رعّاده
بندر المطيري
بين الخزامى والنفل وأخضر القاع
ونسمة هبوبٍ تبري الضيق والضيم
لي في روابيها مقيلٍ .. ومرباع
والأرض سجادٍ تباكى لها الغيم
حبٍّ وسمه الله على عوج الأضلاع
شوفة عطايا الله بها قلبي مهيم
نعشق روابيها ونصغي بالأسماع
صوت الطبيعه لا شَدَت بالترانيم
هيلة آل سليم «شواهق نجد»
أنا بدوي طبعي وأحب البداوه
اشب ضوّي واتراكى بمركاي
متعه ولو فيها عليّه شقاوه
هذا الغرام وغاية القلب ومناي
شوف الفياض الخضر فيها طراوه
والابل عطايا الله يساري ويمناي
سعد عميان العجمي - الكويت
امشي بطريقك ثم تأنَّى بسلامه
واحذر من السرعة السياقة لها ذوق
يمكن بطرفة عين لوم .. وندامه
بعض الطرق من بينها مرتع النوق
واللي ملكها لازم إنه بأمانه
يحرص على أمن البهايم لها حقوق
ينابيع السبيعي - الأحساء
سجةٍ معها تنسّيني هموم الحياه
كنها تاخذ عن الصدر ضيقه وزعله
كل ما ودّهت بالصوت ردت لي صداه
كنها طيّب علي الطيب قوله يفعله
راحتي معها عسى الغيم يمطر من سماه
تربّع الريضان .. والخير ربي يجعله
صالح مصلح الحربي - الكويت
الذود طش وكل الأفراح زانت
في مرتع خايع وزهره منابيت
بعد المحل زايد خضاره وبانت
فزّت عشوبه والتنوع مثابيت
يشبع حلاله يوم وقته وحانت
ومد النظر ياللي عيونك مكابيت
سق الرجل يمّه والأيام هانت
ربيعنا هالعام روضه مرابيت
حمد عبدالله الوايلي - حوطة سدير
يقوله اللي كل روضٍ يشوقه
شوف الربيع ومنبته في الغراميل
محلاه لا جاء الصبح حزّة شروقه
وصوت أم سالم غاديٍ له مواويل
بين الخزامى والنفل مَدّ شوفه
ولا عاد للجوال فيها مراسيل
ما هوب زَمْلٍ لو تطاول اطروقه
لا سجّ وابعد عن هلَ القال والقيل
ينساح لو نفسه عليه امغلوقه
لو كان غرقٍ في هموم وغرابيل
عبدالعزيز العنقري - الخرج
سمحات ليدي وضح ترعى زماليق
في خايعٍ رشّه غزير المزوني
يا ما قناها من رجالٍ مطاليق
تجمّل لحاهم من ضيوفٍ يجوني
فيما مضى يأتي عليها مخاليق
توصل بحجاح الحرم للحجوني
تمشي فجوج الله ولاهي مغاليق
ماكُولها منوع من احلى غصوني
محمد عبدالله الشهري - جبل اثرب
حلالٍ مفلّي، نحمد الله على النعم
بأرضٍ غدت خضرا وعالٍ نباتها
بها سكّةٍ وحدة على شان عشبها
يُحافظ عليه من العدم بجْنباتها
عسى الله يديم الخير فيها لناقةٍ
لناسٍ بصحرا شايفين حْسناتها
محمد مقحم المقحم - الرياض
هذا الربيع اللي له القلب يشتاق
أشتاق أنا يا ناس شوف الطبيعه
ودلّة الرسلان بالهيل تنساق
هذا علاج القلب.. هذا ربيعه
تكفون ودّوني قبل يبس الأرياق
لأهل البداوة .. والمواتر سريعه
بشائر القحطاني - الرياض
نرحب بمشاركاتكم الشِّعرية،
وما تلتقطه عدساتكم من الصور الهادفة
والطريفة على إيميل الخزامى:
rb-khozama@alriyadh.com
صورة العدد