ما بين ضلعان الخلا والشعيبي

اقضي واقزّر معظم الوقت سواح
اضرب مطانيج الخلا فوق جيبي
وابعد عن الازعاج وافارق ارواح
وانزّل العزبة بروضٍ عشيبي
هذا علاج اللي شكى هم واجراح
واشب ضوي قبل وقت المغيبي
واقرّب القمقوم وابريق مفواح
وابهّر الدلة واحطه واجيبي
وازلّها لامن طبخ بنها وفاح
اذا شربت الكيف راسي يطيبي
والضيق والوسواس والهم ينزاح
وسرحان فوق الضلع يقنب قنيبي
واجاذبه بأبيات شعري ويرتاح
يا ذيب أنا لوشفت مثلك غريبي
وليلي مثل ليلك عفاريت واشباح
همن يباريني وهمن يغيبي
ياليت ياسرحان للضيق مفتاح
اكفخ وأنا بكفخ معك يا نديبي
يمكن نحصّل داخل الغار مصباح
واللي هقابي هقوته ما تخيبي
يبشر بنا يا ذيب حنا له سلاح..
نايف العبيد