يحمون دار العزّ لاشان الزمن في ظل قايد على شعبه يروف

حنّا جنود الوطن عونٍ لقادتنا
نحمي ثرى المملكه من كلّ الأطماعي
قل وش تبي يا وطن وأبشر بِفزْعتنا
في خدمتِكْ جاهزينِ بْكلّ الأوضاعي
حفظ النّظامِ بْربُوعكْ منْ مهمّتنا
نحْرسك في جوِّ أوْ في بحْرِ أو قاعي
الصدق والصبر والإقدام عدّتنا
وْعزْمٍ لَوَامِرْ ملكْنا عجْلِ مطْواعي
ناصر جمعان آل عوض - وادي الدواسر
يا دولة العزّ والقرآن دستورك
عشنا بظلك وحنا داخل أركانك
الأمن والخير هو من زود موفورك
كلٍ شهد للرخا من كل سكانك
للامن ناسٍ يلبوا حال مأمورك
نرى التعاون من الجميع من شانك
على الرشيد - رياض الخبراء
رجل المرور مقابل رجل الأمن
تقيدوا بالبعد في كل الظروف
مترين تفصلهم وما فيه ضمن
هذا نظام والمسافه بالحروف
ورجالنا اللي محتمينه بالثمن
يا ذخرنا هم عزنا شي معروف
يحمون دار العزّ لاشان الزمن
في ظل قايد على شعبه يروف
حمد عبدالله الوايلي - حوطة سدير
في كل حيٍ وشارع مركز نقاط
حظر التجول طبقوه بصرامه
رجال الامن ما بين جنودٍ وضباط
الكل منهم مخلصٍ في دوامه
شعلة حماسٍ في الميادين ونشاط
حبّ الوطن في العسكري هو مرامه
الجد جدٍ ما يبي لعب وهياط
من خالف القانون يعطى غرامه
سعود عبدالعزيز الهزاع - نعام
رجال الأمن دايم على الطيب يسعون
ولأفعالهم وإخلاصهم دايمٍ دور
في كل وقت وكل شارع يجولون
الكل يبذل جهد ولا حاصل قصور
ورجال صحتنا بالأخبار يعطون
لاجل التطمّن دايمٍ عزّ وحضور
محمد عبدالعزيز الخنيفر - أشيقر
الله يعزّ الدولة اللي لها صوت
في فعلها كل الدول تحترمها
تبذل قصارى الجهد بالمال والقوت
عن شعبها تكافح عسى ما نعدمها
جتنا الكرونا تحمل الخوف والموت
وتصدت لها الدوله على ساق وقدمها
بالحجر الصحي خلّت الناس ببيوت
نفخر بها في حزمها وفي عزمها
خالد ناصر المخيمر - روضة سدير
الرجال الاوفياء بطبعه تسير
بكل موقع والوفاء سلم الرجال
لاجل راحتنا لهم فضلٍ كبير
قلت انا الاخلاص دايم هو مثال
الوفاء هو عادة باللي جدير
للوطن عزّ وفخر وبلا جدال
ريان محمد الخنيفر
شوفوا رجال الأمن يا ناس تكفون
هم يسهرون الليل وحنا ننامي
من أجل صحتنا علينا يخافون
أدو عملهم بالوفا.. والتمامي
في بيوتنا نفطر وهم ما يفطرون
إلا على حد الرصيف الأمامي
لأجل سلامتنا يخافون كورون
يدخل بيوتٍ تهمل الالتزامي
سليمان عبدالعزيز السنيدي - الرياض
نرحب بمشاركاتكم الشِّعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
صورة العدد السابق