تجارب الايام

الى رزقك الله كفو يحسَب خوي
لا تستهين بخوته وحقوقها
خل التعامل بينك وبينه سوي
وتبقى علاقتكم رفيعٍ ذوقها
والى سرح فكره مع الهم وضوي
مشاكل الدنيا على طاروقها
لا يخلفك ما قيل والا ما روي
ما كل كلمه متزن منطوقها
لا يمكن العاقل عن الحق يغوي
واهل المروه ما تشين اوفوقها
وان حده الوقت وكوى قلبه كوي
واحتاج فزعه والزمان يعوقها
احذر تبور وتلوي ذراعه لوي
تغيب شمسه بعد وقت شروقها
كم واحدٍ في داره الذيب يعوي
بعدالمعزه والغلا في سوقها
لو كان له عقلٍ من الحكمه روي
ما ضيّع الدره ولا صندوقها
وكم واحدٍ نجمه على القاع يهوي
نفسه لحب الذات زايد شوقها
لاجل المصالح يطوي الدنيا طوي
والى انتهت شال الشجر بعروقها
واللي مثل هذا لا طبخ ولا شوي
عله لخلق الله بوسط حلوقها
تجارب الايام لاصداها دوي
تعطي دروس بينات فروقها
والخوه اللي مالها ساسٍ قوي
معذور من حط النصايب فوقها