لعْبه لها في ماضِيٍ راحِ شأني كان اسْمها عنْدِ البِنَيَّاتِ صَقْله

سبع الحصا لعبة على عصر الاجداد
صارت تراث بالمتاحف لها شان
والمروحة من معدن الخوص تنعاد
فيها جمال بالصناعة .. والاتقان
حبّ القديم لبعض الاشخاص شداد
يشعر براحة لا تفكر بالازمان
علي الرشيد - رياض الخبراء
لعبه يسمونها الصقله
مبطي وقت الاجدادي
ما فيه حاجه ولاحفله
وفيها تسلو الأجوادي
لاما تكلف وهي سهله
حصا يفرّق له أعدادي
والجيل ما يعرفوا شكله
جوال حتى على الزادي
حمد عبدالله الوايلي - حوطة سدير
الشوقِ للْماضي بلهْفه خذاني
ماضٍ فؤادي مَعْهِ ممْتدِّ حبْله
فيه البساطه معْ جميلِ المعاني
ويْميّزهْ طيبٍ تبادلْهِ أهْله
لعْبه لها في ماضِيٍ راحِ شأني
كان اسْمها عنْدِ البِنَيَّاتِ صَقْله
منْ خَمْسِ حصْواتِ وْيدين الحساني
لعْبهْ بها أنسٍ ومعْ ذاكِ سهله
ناصر جمعان آل عوض - وادي الدواسر
كانت تسمى عندنا لعبة الخال
يوجد معَ للعاب ضحك وشطارة
الحفظ واجب يحفظه كل رجال
لو ضاع منا اتراثنا يا خسارة
وكان فيها بعض لعراف تنقال
متخالفة مابين حارة .. و حارة
ناسٍ تصدقها .. وناسٍ محال
في ذلك التاريخ قبل الحضارة
محمد عبدالله الشهري - جبل اثرب
منظر يعيد الذهن للعابٍ قديمه
البساطه .. والأصاله طبعها
يَا زين لعب الجد في يده الكريمه
بحجار زقطه من حصا أرضه جمعها
عهد مِضَى بساطه ودِيْنٍ وشيمه
وألعاب ترفيهٍ فقدنا نوعها
يَا كِثِرْ ألعابٍ قديمه ذات قيمه
متوارثة كل الخطا في قطعها
سعود عائش الحربي - جدة
لعبة زمانٍ فايتٍ يا حسافه
فيه الوناسه والليال الجميله
فيه السعاده والوفاء واللطافه
مهما يطول الوقت مابي بديله
حتى ولو قالوا كثير الكسافه
يبقى لي الذكرى برحله طويله
سطام المسردي - الرياض
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
صورة العدد