ترى الحياة الفطرية واجب علينا نرعاها

الصيد جاير واصلٍ حد الاسراف
بدوحه معلّق له من الصيد غزلان
ماهو فخر لو صايدٍ عدّة أصناف
مخالف نظام الصيد في ذبح قطعان
جرّة وعول البر ما عاد تنشاف
شنو عليهن حرب في كل الامكان
بسلاح ناري موترٍ كنّه إسعاف
وفي كل ضلعٍ واحدٍ حط مسكان
مربى غزال الريم في كل مشراف
دعها تجوب الأرض قفار ووديان
سعود عبدالعزيز الهزاع - نعام
قلبي على اللي عيشته كلها درق
ذيبٍ يجر الصوت من جال للجال
جاه القضاء راحت حياته كما البرق
قفّت به الأيام هذيك الافعال
آخر زمان معلّقٍ يشبه العذق
فوق الغصن مربوط يا ناس بحبال
خالد ناصر المخيمر - روضة سدير
الذيب متوحش ولابه غرابه
لكن بعض الناس فعله عجيب
مصمم انه يبيد الذيابه
يمكن تقول الناس ماهو مصيبي
زود على الجثّه حريق وعذابه
واضن هذا الفعل امراً غريبي
علي الرشيد - رياض الخبراء
يا سالك السكه ترى الوضع مزري
دربك خطير وشوف كثر الذيابه
ياما بشر ماتوا من الذيب بدري
غدربهم ذيبان ماسرع سرابه
ابعد عن السكه اذا مانت تدري
تغشى الخطر وتقول ماحد درا به
سرحان جايع والبلا قال عذري
مابه غنم والموت نوخ ركابه
خذها نصيحه كان مانت متغطري
ارجع مع دريبك ودقه كعابه
عبدالكريم النغيمشي - لوذة
يا مفني البيئه تراك انت غلطان
يالآدمي فعلتك هذي جريمه
هذي فعولٍ مابها خير وإحسان
ترى التفاخر نقص ما هو غنيمه
هذا الفعل بالبعض نقصٍ وخسران
الرفق واجب ارحموا هالبهيمه
محمد عبدالعزيز الخنيفر - أشيقر
يا إبن آدم ياللي تتباهى
بأفعالٍ تؤلم ما أقساها
تعرضها وانت تعذبها
بهايم الله أحياها
مراتٍ وانت تغرقها
أو تشعل نارٍ تلظاها
الله وصانا بالرحمة
في الكبد الرطبة جزاها
خف من ربك ياللي قلبك
خالي من الرحمة وسناها
الصيد الجاير محرّم
ولا تسرف في قتلاها
إلاّ الي فيه مضرّه
عن حلالك إحم حماها
لكن لا تجعلها عادة
في ابادتها في ماواها
ترى الحياة الفطرية
واجب علينا نرعاها
نبي نحميها ونكثرها
ونتركها ترعى بمرعاها
صالح علي المبارك - حوطة سدير
الله وحده منفرد بالكمالي
وغيره نتاجه دايمٍ قد معقوله
وحوش مقتوله وسط مهماً خالي
وتعليقها عقب القتل ما هي بطوله
والشجر جمال مع فيّ وظلالي
هذي معالق بضعة وحوش مقتوله
العقل لا خالف لعادات واحوالي
بكل المقاييس عادةٍ غير مقبوله
يا زين هالايام بالبر مقيالي
وخروف هرفي جنيه النّار مشعوله
سعود عائش الحربي - جدة
منظر كلاب معلقه فوق الاغصان
يالله دخيلك من مناظر غريبه
اللي تسبب واضح الحق غلطان
أخطأ على البيئة ولازم حسيبه
والصيد جاير ماله اليوم ميزان
ما خلوا اللي سارحٍ في شعيبه
حمد عبدالله الوايلي - حوطة سدير
شيٍ نشوفه مؤلم ولا يمكن يصير
الفعل هذا ظالمٍ وش ينفعك
فكر بدرب الخير.. فكر بالمصير
لا تطاوع اللي من سلومه ضيّعك
يا صاحبي فعلك ترى والله خطير
احرص على درب النجاة ويرفعك
ريان محمد الخنيفر
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
صورة العدد السابق - الذئاب