أيام راحت سرعها ما درينا يوم الشباب وفزته ليته يعود

يازين وقتٍ مضى وسنين
يوم المواتر ارخيصات
..... ثمان وسبعين
وامن احسن الصناعات
اموقفٍ عند بيت الطين
واليوم ذكرى حكايات
عبدالكريم عبدالرحمن السلوم - القرائن
لنا معك يا .... ذكرى جميله
زمان وقت الطيب والطيبيني
اخوك قد سقناه هذا موديله
ثمان وسبعينٍ مضى له سنيني
راعيه شاري رادو ينصغي له
يشغل على القرآن للسامعيني
سعود عبدالعزيز الهزاع - نعام
يا هل البيوت اللي لها مدت سنين
ثوابت الدنيا على طول الاعمال
مدري مبانيها متى مار مبطين
راحوا اهلها ما بقى كود الاطلال
واللي سكن فيها ترى ناس فانين
دنياك لو طالت حشى مالها حال
تزول ما يبقى على الوقت باقين
ذكرى جميله يوم ذكر الابطال
حمد عبدالله الوايلي - حوطة سدير
ذكرتني يا صاحبي بيوت طينا
تلقى الدفا بوسطها علم ما كود
ياما سكنها ناس منا .. وفينا
ذكرى قديمه ياعرب مير ماتعود
موتر قديم ولوحته ما تبينا
مالحق ساهر وينه اليوم ياسعود
ايام راحت سرعها ما درينا
يوم الشباب وفزته ليته يعود
خليف فهيد الحربي - الرياض
قفى الزمان الصعب يا بكر هذال
ما باقي من الذكرى رسومٍ حزينه
شايب معه رادو على الحجار شغال
والهلي اللي واقفٍ آه يا زينه
وقت البساطه راح من بعد ما طال
والوقت هذا خير يا عايشينه
أجدادنا عاشوا مع قلّة المال
تجرّعوا فقر الزمان وسنينه
خالد ناصر المخيمر - روضة سدير
الرجل دايخ يبي يرتاح
شكله من الشغل تعباني
لبّق وقفل .. معه مفتاح
دنّق على الباب نعساني
..... ترقل وزيته ساح
تنتع إذا عشّقه ثاني
يارب تغفر لرجلٍ طاح
ومن التعب ذاق مراني
ربّى عياله .. وتالي ناح
راحوا وخلوه وحداني
عبدالكريم النغيمشي - لوذة
سيارةٍ من زمانٍ فات
حيث العلوم الطيّبة والجميله
والجار جنب الجار مابه مسافات
الخير واجد.. والقلوب الأصيله
أحمد الخالدي
وقتٍ مضى راح يا زينه
فيه التواصل مع الأصحاب
والبيت مبني من الطينه
وفيه البساطه .. والأحباب
بشائر القحطاني - الرياض
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
صورة العدد مرسلة من عبدالكريم بن خزيّم
Your browser does not support the video tag.