اعيوننا من صافي الدمع غرقا

رميتني يابو العيون النواعيس
برموش نجل تزرق القلب زرقا
انا اشهد اني منك شفت التواعيس
انزل من المشراف يازين وارقا
في مرقب ماجاه غير القرانيس
اخيل مزن لامع منه برقا
اسهر وراقب للنجوم المراويس
على وليف يسرق الحال سرقا
طفل جماله فاق لندن وباريس
واهل اليمن والهند وبلاد زرقا
جلبابها شاله اغضاض غواريس
ماطيق عنه اليوم بعد وفرقا
اسهوم حبه في خفوقي غواميس
وبالكبد حط سخيف الوسط عرقا
ريحة نسمها مع هبوب النسانيس
تنعش قلوب بين الامواج غرقا
قمت اتوجد من هموم وهواجيس
وانوح لاجله كل ماناح ورقا
الصاحب اللي زاهين الملابيس
تطرق ضلوعي عقب فرقاه طرقا
ياخشف ريم ذيروه العساعيس
لاشاف زول دارق فيه درقا
ترى الهوى عذب رجال مدابيس
من سبته يشكون غرب وشرقا
قيس الملوح صاب عقله وساويس
واهل الغرام بنار الاشواق حرقا
يوم افترقنا عند مرسى الاحاسيس
اعيوننا من صافي الدمع غرقا
محمد فهد الجربوع العنزي