خل الرجا في والي الكون معقود

يا نجود أنا مانيب زعلان يانجود
مير الزمن زعّل وسيع البنايد
ايام اقول اني من الناس محسود
وايام اعاف النوم فوق الوسايد
من لا يعرْف الهم مايكسب الفود
ومن لا يقود الرأي ماهوب قايد
ماكل من غنّى له السمع مشدود
ولا كل من يقصد جزيل القصايد
والحمد للي حطّها اسْهود وامْهود
وكلّن يقول انه زعيم البدايد
دون الردي وأهل الردى الباب مسدود
فرقاه يوم العيد واكبر فوايد
واللي يشيل النفس ماهوب محمود
نقصٍ على البيدا ولا هوب زايد
ولا تامن الدنيا ولا تامن السود
وخلك عزيز النفس وقت الشدايد
والجود فهْل الجود شاهد ومشهود
والاّ على أهْل البخل صعبٍ وكايد
ولا ترجي من السِّيد والسِّيد مسيود
تصبح عزيز النفس للنفس سايد
وخل الرجا في والي الكون معقود
والعبد مخلوقٍ وللرب عايد
ولا ينهزم قرمٍ على الطيب معهود
يرقى بها روس النوايف عوايد