أحدٍ رقى للفرع يقطع بيمناه واللي تحت يستقبله بين أياديه

ياما حلا المزرعة يا ناس ذا شوقي
أسعد لشوف النخيل وطيّب اعذوقها
وحصد الثمار وخص وقت الشروقي
ولا شفت في نوّ السما لامع ابروقها
سعد ناصر المسفر
وقت الصرام أقبل وذا وقت مبداه
فيه الثمار الطيّبه يوم نجنيه
أحدٍ رقى للفرع يقطع بيمناه
واللي تحت يستقبله بين أياديه
مختلفة ألوانه وله طعم يام احلاه
سبحان رب مخرجه من مجانيه
علي رشيد الرشيد - رياض الخبراء
حان الصرام وحان جني المحاصيل
والخير واجد نحمده كل حزّه
اهل المزارع تخاف من جيّت السيل
من خوف سيل يخربه ثم يجزّه
وراع الفلاحه يطلب الله تسهيل
ودّه يبيع ويم سوقه يكزّه
ياما تعب يا ناس يحط ويشيل
يبي الغناه وتال الوقت لزّه
خليف فهيد الحربي - الرياض
هذي بلادي تشتهر بطيب الخير
منتوجها تمر على شكل وألوان
ومتنوع بين البلح والرطب غير
فيه الغذاء كامل ولافيه نقصان
النخله اللي خيرها يشبع الطير
الله ذكرها في كتابه والإنسان
يجني ثمرها دون كل وتقصير
الوقت زان والثمر جاهز وحان
حمد عبدالله الوايلي - حوطة سدير
تلقى عذقٍ صارمه واحدٍ فوق
طول الجذع ماجاب تصوير الاثنين
نخلة تصيف لونها الآن في السوق
مشمرخ خصاب ينجلب في كراتين
حانط حمّر واصل الارض برفوق
تبارك الله منظره يبهج العين
سعود عبدالعزيز الهزاع - نعام
نخيلنا ببلادنا كلها خيور
يا ديرتي يا زينها مع نخيله
وأسواقنا مملية بكثر التمور
هذي بلاد الدين ولابه مثيله
حتى النخيل نشوفها داخل الدور
فيه الرطب أنواع مازين حصيله
وتلقى النخيل اليوم للكل ميسور
الله يحفظ بلادنا ومن يجي له
محمد عبدالعزيز الخنيفر - اشيقر
اليوم قص النخل واعذوق
من خير ربي تشوفونه
اشكال وألوان اول لها ذوق
لاحان وقته تخرفونه
الله يستر على اللي فوق
واللي تحت ايتلقونه
عبدالكريم عبدالرحمن السلوم - القراين
حيّ الفلاح اللي من الصبح صاحي
بالمزرعه بين الشجر والغرايس
وجهه تعب من العمل والكفاحي
ما هو من اللي بمرقده دوم حايس
خالد ناصر المخيمر - روضة سدير
يا بلاد الدين والخير الوفير
كثرت نخيلك تسر الناظرين
التمور موفره مهما تسير
نحمد الله في بلاد الطيبين
يا وطن انت عز وفيك خير
بك رجالٍ بالوفاء هم خيرين
مملكتنا والمزارع قلت غير
النخيل أصناف وانتم عارفين
ريان محمد الخنيفر
حب المزارع ناشي في الصميم
وفي كل وقت .. وكل يومٍ وليله
ووقت الطفولة من زمانٍ قديم
وزاد الحنين .. وذكرياتٍ جليله
بشائر القحطاني - الرياض
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
ويا هلا.