بيت وصدى

بيت الاسبوع الماضي كتبه للصفحة الشاعر حاتم عبدالله الشاهر من الرياض حول موضوع وجوب عمل حملة اعلامية للتوعية بغرامات المرور الجديدة والبيت يقول:
ليت المرور يوضح امر الغرامات
بالتلفزه والا بصحف واذاعه
وكان صدى البيت من الشعراء:
ليته بعد يشوف بعض الحركات
هذا الصحيح اقول مهوب اشاعه
ناس تعكس الخط وين الكميرات
يقول ماني واقف ً ربع ساعه
برسل رسالة غير كل الرسالات
والله مالي من وراها طماعه
متى المرور يشوف بعض الغرامات
واللي يعاند قلت يلوي ذراعه
سعد بن صنهات السهلي - الدرعية
مضى ثلاث شهور لبعض القرارات
نبغا المرور يوضح إلنا وطاعه
لأوامره ندفع جميع الجزاوات
من خالف النظام ماله شفاعه
لكن بعض الشعب تخفاه بالذات
نص اللوايح ما قراها طباعه
نأمل من التوجيه تكثِيف نشرات
وايضا ترى االإعلام نور الجماعه
مشعل بن صنت العصيمي- الخرج
حتى يعرف الناس خط المسارات
نمشي على المطلوب سمع وطاعه
ونجنب اللجه وكثر النزاعات
كل يمر وعند نفسه قناعه
واليوم غثونا بكثر الإشاعات
ما تحمل الا الثرثره واللكاعه
والعلم لا جانا من اعلى القيادات
يكشف لنا الخافي ونكسب مناعه
علي الرشيد- رياض الخبراء
راع القياده انتبه للعلامات
واحرص على المطلوب في كل ساعه
ترى القياده فنها ازداد مرات
وامسك معانيها لاتلوي ذراعه
ليت المرور يوضح النا القرارات
تمشي عليه الناس تمشي تباعه
ووتهون المدفوع لأجل الغرامات
ثم يفهم المطلوب بين الجماعه
عبدالمحسن بن محمد المحيسن - رياض الخبراء
هذي اوامر بينوها مهمات
تبي لها توضيح ياهل الشجاعه
على البشر خفي بعض الجزاءات
واحدن جهلها وضحوا ياجماعه
هذي غرامات علينا صعيبات
لازم بها التخفيف وفيها القناعه
ياهل العلوم الطيبه والبطولات
لاجل النظام اليوم سمع وطاعه
ريان محمد الخنيفر- اشيقر
ياللي نويت الدرب وقطع المسافات
ترى القياده فن ماهي براعه
ارفق ترفق لاتغير مسارات
خلك نظامي كل وقت وساعه
تسلم من الي يرصدون الغرامات
والاعلى ماقيل دورشفاعه
الوعي مطلب في جميع المهمات
والحق واضح لاتسمع اشاعه
حمد عبدالله الوايلي - حوطة سدير
نذكر لنا برنامج له سنوات
اسمه عيون ساهره ياجماعه
اليوم ماهو فيه والحين بالذات
ياكثر حاجتنا بدورالاذاعه
كنا نعرف الانظمه والجزاءات
والوعي اكثر من كذا بارتفاعه
واليوم مختلط الصحيح بغشاوات
وماعاد نميز صدقها والاشاعه
نواف بن هايف الجبرين - الرياض
حتى نحافظ ونتحاشى الغرامات
ونترك كثر الهجوله كل ساعه
ساعات نسرع لا جل مريض بالذات
ونعرف بها مخطين ماهو لكاعه
نبغى المرور يبينوون الجزاءات
من شان مابه عذر لاهل الشفاعه
صالح البشري - الرياض
رجل المرور بموقعه بالمسارات
يسعى بتنظيمه بفن وبراعه
وزود على هذا ترا به اشارات
تقطع اشاره ليه ماهي شجاعه
كل الصحافه كاتبه والاذاعات
والتلفزه تعلن وتطبع طباعه
ماقصروا حطوا ملايين لوحات
واللي يخالف ساعيٍ في ضياعه
حمد محمد الحنو - عودة سدير
ماعاد نفرق بين صدق واشاعات
ولحد مع الاعلام ينفي اشاعه
نبغى وعي ياهل العقول الرجيحات
وسط الشوارع بالورق والاذاعه
وبرنامج المرور عبر الاذاعات
امر ضروري يارجال الشجاعه
رجا بن عادي بن رمال - الرياض
ياما سمعنا من اوامر كثيرات
شي يهول والسبب بارتفاعه
ياما انتشر وسط الصحف والمجلات
واللي تبين مانشوف القناعه
نبي حلول ياجماعه سريعات
عبر الصحف واللي يريد استماعه
هذي امور ياجماعه خفيات
لازم نبي التوضيح ياهل السناعه
محمد بن عبد العزيز الخنيفر- اشيقر
بيت الاسبوع
كتبه الشاعر سميحان فهد السويدي من الرياض حول ضرورة اخذ الحيطة والحذر عند الخروج لرحلات البر اثناء سقوط الامطار ومايتبعها من جريان الاودية ومخاطرها ويقول البيت:
يامهتوي وقت المطر طلعت البر
حذرا من الوديان فيها خطوره
نستقبل صدى هذا البيت بأربعة أبيات حتى يوم الاربعاء القادم ويفضل الإرسال عبر الإيميل:
rb-khozama@alriyadh.com