العمر يمضي

اقول بسم الله وحمد ولبيك
يا مالك الدنيا وسبع عوالي
بعض النصايح صغتها شعر واهديك
تجارب احداث طوتها الليالي
مضمونها من دين واحساس مغليك
فيها فوايد مرشده للمعالي
رتب كلامك لا تعجل فيوذيك
ترا الكلام انواع علقم وحالي
والكذب لا تقربه وارفع مخاويك
واحذر من النمام لو كان غالي
والصدق شهد من لسانك يحليك
يرفعك بين الناس في كل حالي
وابعد عن الزلات واحسب خطاويك
العمر يمضي والقدر ما يمالي
زوده ترا نقص والايام تبديك
ما كان خافي ينكشف في التوالي
الايام تتقلب وتضحك وتبكيك
لا تأمن الدنيا ولو كنت سالي
خمس الفرايض نورها دوم يهديك
حافظ عليها لو ظروفك ثقالي
داوم على المصحف ورتله ينجيك
ينجيك في قبر وعند السؤالي
سنّة نبيك نهجها نهج يرضيك
باب السعادة درب نهج مثالي
امك لها فضل وجود يغطيك
مطلب رضاها فاتحة كل فالي
وابوك راس الفخر غالي ويغليك
منزله فوق الراس ويكون عالي
ابوك وامك في حياتك غلاويك
قبل الولد والزوج وأغلى العيالي
اخوك عضدك في المواقف يقويك
خلك معه في الحق واسمى الخصالي
اقرب من ابنك واعطه الحب ياتيك
يبعد عن الغاوين واهل الظلالي
زوجتك واختك وابنتك شوف عينيك
خلك لهم ظل كريم الوصالي
رحمك لها حق ووصل ينجيك
يوصلك بالرحمن رب الجلالي
واحرص على خال وعم يواليك
اكرامهم شيمة زحول الرجالي
قدر نسيبك واهل بيتك وغاليك
ولا تفرق بين عم وخالي
واحذر صديق يوم تفرح يخاويك
ويغيب عنك بيوم ضيق وبالي
والجار لا توذيه لو كان يوذيك
واستره في عرض وحال ومالي
والظلم لا تأتيه عده بعديك
لا تقربه لو كان خصمك يغالي
والختم حمد الله وصلاة وتبريك
على النبي المعصوم كل الكمالي