همسك يجدد فرح خافقي كل ما أسمعه

ان حضرت يصير كل شي بحضورك ربيع
وشمس الافراح بحضورك تطل مشعشعه
انت مثل الغيم لا مر للبر الوسيع
من بعد ما هل ّوبله والارض مربعه
انت من صادف عيونك ولو لمحه يضيع
يرتبك وان كان له درب صار مضيعه
انت رمشك لا رفعته هوى عقلي صريع
ومن يسلهم في عيونك يلاقي مصرعه
انت لا من جيت عندي غدا وقتي سريع
وانت تدري نكهة الوقت معك منعنعه
لحظة اللقيا معك تنقضي بشكلٍ فضيع
الثواني والدقايق تهرول مسرعه
كل لحظه فيها قربك لها معنى رفيع
نبضةٍ تسعد خفوقي وفيها منفعه
قرب انثر همسك العذب يالظبي الوديع
همسك يجدد فرح خافقي كل ما اسمعه
والله انك كل ماتامر لقلبي يطيع
ينتظر منك الاوامر ولا اقدر امنعه
حسنك الفتان ياخذني لمنظر بديع
كمله ربي وسبحانه المولى ابدعه
شوفتك تزرع فرح داخل القلب الوجيع
ولمسة كفوفك علاج الجروح الموجعه
عبدالله سليمان العمار - القرائن