اللغز

كتبه الاسبوع الماضي احمد بن ناصر المحرج من الرياض ويقول:
ابنشد اللي يقنص اللغز بالحال
عن رجل خلا قوم ما احدن يدله
جاهم نذير وعقبها الحال ماطال
صوت الرجل سمعوه ولااحدن وصل له
حروفه اربع له شبيهات وامثال
وين الذي يرمع ولغزي يحله
والحلول شعرا:
حوار ناقة صالح دونها الجال
زعج ثلاث اصوات مما حصل له
صفراء و حمراء وفيه سوداء لها حال
هذا جواب اللغز ياصلك حله
محمد ابودحيم - البدائع
يا مرحبا ي طيب العم والخال
ياللي بنيت اللغز ابشر بحله
حوار للناقة بلا قيد و عقال
ناقة نبي الله عملها تدله
علي رشيد الرشيد - رياض الخبراء
اللغز جا وان على اللغز حلال
يامرحبا باعداد ماساح ظله
واللغز جاء حله سريع على البال
حوار ناقة صالح اظن حله
ثامر سند الرمال/ جبه
لغزك يبن محرج بدا يشعل اشعال
وانا اعشق الالغاز دقه وجله
والحل حوار لناقة ماض الاجيال
والله يوفقني للغزك واحله
مطلق الفايدي/ حفر الباطن
لغز الاسبوع
يكتبه للصفحة الشاعر صلاح بن عبدالله اليابس من الدمام ويقول:
أنشدك عن رجلن يجي لاكثر الناس
يجي صحيح الاسم لا صار معكوس
رجلن يجي الرجال ويصير محتاس
ويبين شكل الرجل بالهم ملبوس
نستقبل الحلول على البريد الالكتروني
rb-khozama@alriyadh.com
أو الفاكس 014871070
كما نرحب بطرح الألغاز الجيدة
وننوه بعدم المشاركة الازدواجية بين اللغز وصوت الصورة واختيار احدى الزاوتين.