فيلسوف

فيلسوف أصدر كتاب ومن على صفحة غلافه
اسمه الي مابقى بالذاكرة منّه بقايا
كنت افتش في رفوف المكتبة والطرف شافه
كان مضمونه حكم وامثال بالحب ووصايا
قال لامنك عشقت وهمت ففعل ما تخافه
وجيت كلي شفي الميصال وعروقي ضمايا
جيت تدفعني عزوم الشوق ل اكمال المسافه
وطرقتي ذكراه والذكرى تسوي بي سوايا
كيف أبنسى من له الخفّاق بايع بالخلافه
والمشاعر جددت عهد الولا بين الحنايا
اذكر اني قلت ابتناساه وابليا كلافه
مر طيفة بين حبل الشوف وعيون المرآيا
من نسيم الفجر لاذعذع تشابهه اللطافه
ومن بياض الغيم لابرقت فيه ألقى حلايا
ان مشى مثل الاصيل الي تبي جهد وعسافه
وان وقف كن الهبايب حول محبوبي سبايا
وان سكت مثل الفقير الي ستر عوزه عفافه
وان حكى كن الحكي يختال ما بين الشفايا
كل وصفه كوم ووصاله نذير الخوف حافه
غير سبرات العيون الي تباشر بالخطايا
يشهد الله ما ارتجي منهم جميل ولا ضيافه
وان حكوبي قلت مشروهي على بيض النوايا
والنهر عذب المذاق الخوف خيم في ضفافه
وان بغيت ارده كني وارد حياض المنايا
وين اوجه من جيوش الشوق وجيوش الحسافه
كيف اجابهم وحب الترف يهتف بالسرايا
بس أنا مثل النخيل اللي شكى جذعه جفافه
جعل تسقيه المزون المردمات م العطايا
باقيٍ فيني اظلال وشامخٍ كلي أنافه
انعم بلطف الظلال وخل لي حب الزوايا
والكتاب الي يقول إن همت ففعل ما تخافه
والله ان الخوف لا غنى البطى عذب السجايا