وطن شامخ

يا أول الميزان تاريخ مشهور
يوم الوطن يوم التلاحم والاصرار
فيه نتذكر ماضي الوقت وعصور
يوم الوطن في ما مضى كله اخطار
ويوم القبايل بين ناحر ومنحور
وما يأمن الطرقي حياته بالاسفار
ومن الغبن والظلم كم مات مقهور
ومن الفقر والجوع ما نشعل النار
لين استتب الأمن وبليس مدحور
من فضل ربي ثم اخو نوره البار
عبدالعزيز اللي سرى يقطع البور
من دار اخو مريم معه عدة انفار
لين استقر بنجد مع فجة النور
ورجع حكم جده على كامل الدار
وأسس وطن شامخ بالامجاد مذكور
ووحد وطن له تلتفت كل الانظار
واليوم سلمان الحزم عنده الدور
ابو فهد يكمل على الدرب مشوار
حازم وصارم والشعب كله صقور
وعند المواقف للوطن نرخص اعمار
الحاكم العادل عمى الظلم والجور
يوم ان غيره يذبح الشعب بالنار
ولي عهد المملكه حامي السور
يردع عدو الدار والسيف بتار
بالطيب والمعروف والخير مذكور
شبيه جده بالكرم وافي الاشبار
مرحوم من وحد وطنا ومغفور
ذنبه ومسكانه مع الناس الابرار
وفي جنة الفردوس ينعم مع الحور
عبدالعزيز الفيصلي نسل الاحرار
يادار منك الشرق والغرب مبهور
وقف وصفق لك تحيه ومقدار
ويادار حبك داخل القلب محفور
بصدور شعب المملكة صغار وكبار