أهل البيلوت

ألا يابن عمي ويش علمك على البيلوت
ترى الشايب اللي مثلكم ما يدور له
ولا يهمني قول أربع مية مع الكبوت
ولا بفتخر في اللي يقولون عبر له
أنا بفتخر في طاعة الله قبل أموت
وربي رحوم للذي قام يسهر له
أنا أحب أقوم أصلي الفرض قبل يفوت
وأنا مسلم لله أسبح وأكبر له
وأنا أحب علم الصدق هرج عليه ثبوت
ولاني بحب الكذب يا كيف نصبر له
وأنا أحب ممشى البر لا صار وسط خبوت
وأنا أحب ذب الرجم في العصر وأسبر له
وأحب الفياض وعشبها كنه الياقوت
وأحب السحاب المدلهم لا تزبر له
وأحب الدلال الصفر والنجر جاله صوت
يصكه غلام للنشاما تسير له
واحب المجالس والنظر يمها ملفوت
وأحب السوالف للخوي وأتخير له
وأحب السوالف مع رجال كبار بخوت
وأحب الرجولة والكريم أتذكر له
وأحب الكرم والسالفة والرجال سكوت
وأحب استمع في الطيبة وإن تيسر له
ولاني باحب أجلس مع الخبل والسربوت
وبعض العرب يا زينه بعيد واستر له
ولاني باحب اللعب اليا صار فيه كروت
خسارة زمان والمصور يصور له
لا من الحكم طلع له الكرت شاته شوت
وإن جاء بيتعذر ويش عاد يتعذر له
ولاني باحب اللي جلس في يده الريموت
تسلّى على التلفاز جالس وينظر له
اللي حالم له حلم ان فوق العبايه كوت
وتكفون ياأهل العرف من اللي يفسر له