الحب

نشدني صديق قال حبك ورا ما بان
ورا في الغزل مالك بيوت مسويها
ولا لك غزل يالقرم بسم الله الرحمن
ورا ما تذكر هنوف مهاويها
وانا اقول قلب ما يحب الهوى غلطان
وبشرك والله من هنوف مصافيها
وابا اعلمك وانت تعوذ من الشيطان
مدام النشامى تسمع لي بذنيها
انا احب حب تولع به العربان
اعيال النشامى اللي طوال يمانيها
احب الرجولة والرجولة لها سيسان
ترى ساسها لاطال يرسيها
واحب الكرم واهل الكرم والكريم معان
كريم ونفسه للمواجيب مسخيها
واحب اشتري اللي عود ازرق من الدكان
واطيب ارجال جت لي واقهويها
احب الدلال الصفر من صنعة الرسلان
اليا دارت المجلس وماجوبها فيها
واحب الحرار اللي لها في العشاء برهان
تقضض على جول الحباري وتدميها
احب الحصان اللي سبق والحصان احصان
واحب الذلول اللي تقدم براعيها
حسينة حلايا مالها في الحلال اثمان
اخطات الاصيل اللي ليا افرحت راعيها
واحب الجيوش اليا ارزمت داخل الميدان
اليا قادها القايد وهرول يباريها
واحب الصحارى خص اليا شبعت الحيران
اليا بكر الوسمي وزانت مراعيها
واحب الحلال اليا انتشر داخل الصمان
قطاعين ذود والمواتر ابتاليها
واحب البيوت اللي تظلل بها البدوان
اعيال الجزيرة اللي ساكنين باراضيها
واحب الخيال المدلهم اليا انهمر ودان
واحب الفياض اللي تناسف علاويها
واحب امزع رجلي واشرف على الرعيان
وامد النظر في اللي عسى المزن يسقيها
واحب الجيوش التي تمرهد مع الخليان
تعانق طيور الجو وتمشي ممشيها
واحب الرفيق اللي في وقت الشدايد بان
رفيق الرفيق ورفقته مايخليها
واحب الخوي اللي تجي كلمته ميزان
وزن كلمته لجل الرجاجيل تغليها
واحب القصيد اللي يحكم على القيفان
واحب الصفوف اليا استوت قدم واليها
واحب السوالف واتسمع من الشيبان
اليا وردوها بيضت وجه راويها
واحب المثايل اليا ضربها مثل راكان
واحب العلوم الطيبة وافتخر فيها
واحب القصير اللي يبين لك الصفطان
مثل جيرة كل المخاليق تطريها
وهي قصرة محمد اليا عدت الجيران
له قصرة مجالها اللي يحاليها
واحب الهنوف اللي لها في الحشاء مسكان
فتاة على السنه اخفاف مواطيها
هنوف تداعبني اليا جيتها زعلان
هدفها تسليني عسى الليه يعافيها
ستيرة ولا تحرص على فتحة البيبان
ولا تلتفت في اللي يبا يلتفت فيها
واخير المناوى حلها طاعت الرحمن
لا ولاهني اللي صلاته مصليها
وعقب كل هذي هقوتي كلمتك بهتان
وانا كلمت العقل لاجات رضيها