يا علي... وينك

ناداه موته وأمطر الحزن ونات
راح بقدم ساقه لحتفه يلبيه
ضمه على صدره ويلفظه سكرات
والروح فاضت.. حق يا عين تبكيه
عشرين عام وودع الناس بسكات
واطلق عنان الحزن في قلب مغليه
الأهل كل صاح بالصوت ما مات
كل ينادي (يا علي) وينك اش فيه
طاريه عود فاح طيبه وبالذات
وسط المجالس شيخ وأمير يطريه
ما للسفر حاجة ونمضيه حزات
نضمي اللقاء والوقت ما عاد يمديه
الموعد اللي نحتري فيه هيهات
حل الفراق وكل زفره تناديه
يا موت غفله جيته بطرف لحظات
وفي خاطري من طيب صيته أوفيه
أشوف طير بالسما ماله أصوات
سربه مثل حلم تمنيت أحاكيه
أسأل عيونه كم من الوقت قد فات
يمكن جوابه يروي القلب يشفيه
أهز غصن الحزن وانثره دمعات
وأوراق شوقي تنتحب في نواحيه
نبضك ترى يا قلب طمئنه بآيات
ودمعك ترى يا عين بالصبر حفيه
الموت حق.. وجعل روحه بجنات
تغنيه عن دنيا.. دنيه بتشقيه
وأسأله ربي عالم بحال الأموات
يرحمه في قبره ويا لعفو يجزيه