العين تدمع لا طرينا بريده واليا ذكرت عقيل ترجف عظامي

في حفل افتتاح مهرجان بريدة الترويحي 26 كان للشاعر الأنيق والمبدع وابن بريدة تركي المشيقح مشاركة شعرية جميلة حظيت بإعجاب كبير لدى كل من حضر هذا الحفل.. واليوم ننشرها لكل من يعشق الشعر ولكل من يعشق بريدة ولكل من يتابع هذا المهرجان الشيّق..
أكيد لا جت للعلوم الاكيده
يفز قلبي لين أشد الحزامي
ماهوب بيت لاشطبته أعيده
ولاهو حبيب ما يقدر غرامي
العين تدمع لاطرينا بريده
واليا ذكرت عقيل ترجف عظامي
هبت لبو تركي وجانا حفيده
فيصل ولد بندر كبير المقامي
وأنا لجل هذا أبكتب قصيده
وابستميت ألين ياصل كلامي
سلام يا نسل الشيوخ المجيده
يا عز وأطهر من وصلّه كلامي
حبك سكن وسط الخفوق ووريده
ألين ربع بالنفل والخزامي
من وين أببدأ بالصفات الحميده
وأنت أكبر أكبر من قصيد وهيامي
كن الكرم ينبت من قطاعت أيده
اليا تبين ما نشوف الظلامي
واليا حكى كن الضلوع الهميده
يورد عليها شيخ وقت الصيامي
يا طيب فاله لا ذكرنا عضيده
عبدالعزيز الوايلي القطامي
أبو الوصوف النادرات الفريده
كم بل ريق وكم تزهل لضامي
الله قبله وحببه في عبيده
أبشر بعزك ياسمي الامامي
اقسم قسم لو طلعوا بالجريده
شكلي وأنا اقصد كان بان التزامي
لاهل الوفا وأهل الكرم العقيده
أهل الظفر وقت اللقا بالحسامي
ومثلي يرحب فدوة ضيوف سيده
يا مرحبا يامرحبا بالحشامي
المدح كلن في زمنا يجيده
لكن هنا بأرض العزاز الكرامي
اللي أنولد واللي ربا في بريده
يفرش ضلوعه بانتماء واهتمامي
وياسيدي لازم اختم القصيده
وهاذي تحيه يا كبير المقامي