قالوا بريدة قلت ما يقرب العيب دارٍ تخط المجد رسم وعلامي

الشاعر محمد بن عبدالرحمن الطويان.. من كبار شعراء مدينة بريدة، يجيد شعر المحاورة ويعتبر أحد نجومه.
ألقى في افتتاح مهرجان بريدة الترويحي قصيدة رائعة جداً أمام صاحب السمو الملكي الأمير فيصل بن بندر بن عبدالعزيز أمير منطقة القصيم، ونالت استحسان الجميع لجمالها وروعتها حيث صاغها الشاعر بروح المحب والعاشق لمدينة بريدة، وكيف لا وهي المدينة التي لها تاريخ مشرف كبير ويضرب بها المثل في كل مكان وزمان..تلك القصيدة الرائعة التي ألقيت في حفل الافتتاح للشاعر الطويان ننشرها اليوم بناء على طلب الكثيرين من قراء (الجزيرة) عبر اتصالاتهم الهاتفية على مكتب القصيم الإقليمي..
بسم الله الرحمن عالم خفى الغيب
مبداء كلامي يالجموع الحشامي
حنا حضرنا من عرفنا به الطيب
فيصل ولد بندر كبير المقامي
فيصل ولد بندر عطيب المضاريب
شيخٍ على شرب اللوازيم ضامي
حلاّل عقّاد الأمور المصاعيب
فكّاك روس المشكلات العظامي
فيصل ولد بندر كبير المناصيب
أمير دوحة نجد نسل الامامي
عبدالعزيز الصيرمي مرخي الجيب
حر شهر بأرض الجزيره وحامي
حرٍ تعلاّ المجد فوق المراقيب
عدّى على روس الجبال الزوامي
قاد الحقيقه زهّب العلم تزهيب
لين انكشف نوره وبدّد ظلامي
قاد الجزيره يوم صك المغاليب
بالشرع وعزومه وحد الحسامي
ويامرحبا من قلب كل التراحيب
بالصارم النادر بعيد المرامي
ابومحمد شوق بيض الاكاعيب
المترفات الطيّبات الاسامي
إبن الملوك مجودين المقاضيب
الله وهبهم للوطن والسلامي
والنايب الظافر عريب المناسيب
عبدالعزيز الماجدي القطامي
عضيد فيصلنا زبون المواجيب
على جبينه للمراجل وسامي
في مهرجان المجد عز المطاليب
كن الفرح يقبل جرادٍ تهامي
قالوا بريده قلت صفو المشاريب
بين النخيل وصوت شدو الحمامي
قالو بريده قلت يا شمّخ النيب
بين الغصون الخضر سدر وسلامي
قالو بريده قلت صفرٍ محاديب
كيف الرجال وحيل كبشٍ يسامي
قالو بريده قلت ضد المحاريب
يوم إنها ما بين رامي ورامي
قالو بريده قلت قومي مناجيب
موفين عهد أجدادنا بانتظامي
أهل المواقف ساعة الحط والجيب
أرداهم اللي بالقسا ما يضامي
قالو بريده قلت حلو الاساليب
منطوقهم ياسيدي بالتمامي
قالو بريده قلت ما يقرب العيب
دارٍ تخط المجد رسم وعلامي
قالو بريده قلت يالقاف ترتيب
تستاهل الديره وشيخٍ عصامي
ديرة فروخ عقيل وأهل التجاريب
بقلوب أهلها كن ودّك وشامي
الحرف شاهد والمشاعر مناديب
تنساق لك مثل المطر والغمامي
وياسيدي حيّاك وإبشر على الطيب
حنا نظر عينك بوقت الزحامي
حنا رجال الدار بأمر المعازيب
ليا طغى نذلٍ دروبه حرامي
لو شلّة التخريب سود المكاتيب
قالو وقالو ما يفيد الكلامي
ما نلتفت لمروجين الاكاذيب
شهب الوجيه ومكتسيها عسامي
أبواق للفتنه مزامير تغريب
خِوّان مذهبنا خطيّه وأثامي
أحدٍ يبابي في ديار الاجانيب
وأحدٍ بوسط الدار يطلق سهامي
يخسون ما نحسب للانذال تحسيب
نطق راس الشر حتى ينامي
وختامها يا مرحباً فيك يالذيب
إقبل تحية حفلنا والسلامي